Feagai ai ma le Manumalo i Taimi o Faiga Sauā

¹ I aso nei o loo tatou ola ai i se lalolagi ua tumu i faiga sauā. E lē gata i le tele o faafiafiaga o loo faamatilatila mai ai faiga sauā, ae ua masani foi ona avea tagata ma taulaʻiga o osofaiga sauā. E pei lava ona faatupuina e le ʻau Nefilimi le matuā salalau atu o faiga sauā i le lalolagi a o lei oo mai le lolo, ua faapena foi i le “vaitaimi faaiuiu o le faiga o mea” lea o loo tatou ola ai, ona mātaulia i le faatupulaia o faia sauā.—Kene. 6:11; Mata. 24:3, (NW) 37, 39.

² I le vaai atu i le anoanoai o faiga sauā, ua toatele ai pea tagata o loo manatu faapea e tatau ona iai i o latou fale se fana po o se isi auupega e tetee atu ai i tagata osofai po o ē fasitagata. Pe tatau ea i Kerisiano ona faia lenei mea? E mafai faapefea ona tatou maua le puipuiga e tetee atu ai i faiga sauā?

³ O lo tatou puipuiga autū o le iai lea o se faalagolago ma le mautinoa atu ia Ieova. E tele taimi ua faasaoina ai Molimau a Ieova ona sa lē iai ni auupega ia i latou pe i o latou fale. Pe ana fai sa iai sa latou auupega, semanū e fasiotia i latou. (Mata. 26:52) Sa faasaoina i latou auā na ia i latou le faatuatua atu ia Ieova e pei ona faaalia mai e Tavita i le Salamo 18:48: “Ua laveaiina aʻu [e Ieova] i e ua ita mai ia te au; ua e faasilisiliina foi aʻu i e na laga mai ia te au; ua e laveaiina aʻu i le tagata faasaua.”

⁴ O se tasi o vala o “aso e gata ai” o le leai lea o se pulea totino. (2 Timo. 3:1, 3) Ae maise lava i Samoa, e masani tele tagata i le ita vave. Ua lipotia mai ni tulaga sa faaaogā ai e se tagata ita se fana na ia te ia, e faamataʻu ai le isi tagata, ma oo lava ina fasiotia ai lea tagata. Ona o le teuina o se fana i le fale, na pule ai nisi fanau i o latou ola pe fasioti ai e le isi tamaitiiti le isi tamaitiiti ma le lei fuafuaina. O nisi tagata Samoa latou te aveina se fana pe a agaʻi atu i le faatoaga. Aisea? Po o latou fuafua ea e faaaogā i ni tagata atonu o le a gaoia a latou faatoaga? O le faia faapea e mafai ona nofosala ai i le toto pe afai latou te fasiotia se tasi.

⁵ E mafai faapefea ona e taulimaina mataupu pe afai e te feagai ma se tagata solitulafono? Ia faailoa atu o oe o se tasi o Molimau a Ieova. Aua neʻi e fia faatautū atu i lē o loo faamataʻu atu ia te oe i ni faiga sauā; ave i ai mea faitino na o loo ia tāpā mai. E sili atu ona tāua lou ola nai lo na mea. Pe a puʻea ma faamataʻuina oe, ia valaau atu ia Ieova mo se fesoasoani. (Faata. 18:10) E tusa lava pe ua tatau ia te oe ona e puipuia oe lava po o ē pele ia te oe mai se tagata fasitagata, i le faaaogā o so o se mea o iai i lea taimi, ae lē tatau lava ona e faaaogaina se fana.

⁶ Ae faapefea pe afai o loo iai se fana a se Kerisiano mo le tapēina o manu mo meataumafa? E lē sese lenei faaaogaina o le fana, ae lelei pe a fuafua lelei pe lē ono avea le iai o se fana i le fale ma itu e oo mai ai lamatiaga o le faamanuʻalia ai o se isi pe oo foi ina fasiotia ai. Talu ai o fana e masani lava ona faatoʻā faaaogā mo le tapēina o manu lapopoa, ma e lē tele ni taimi e manaomia ai ona tapē se manu faapena mo se meataumafa, e ono mafai e se uso ona faanoi mai se fana mai se tuaoi, ona alofia ai lea o le lamatiaga pe a teuina se fana i lona fale.

⁷ Ioe, i le Tusi Paia lava ia, faatasi ai ma le lagolagoina e mea o loo tutupu i ona po nei i Molimau a Ieova, ua faamanino mai ai e faapea, ua lē fautuaina Kerisiano ina ia latou tauaveina, pe teu o sa latou meatotino i le fale pe i nisi nofoaga, se fana po o se isi auupega e faapogaia ai le oti, mo le faaaogaina i tagata osofai po o ē fasitagata. (Isa. 2:4) O se tasi e sauniuni mo faiga sauā ua ia valaaulia foi faiga sauā. Nai lo lea, o le faalagolago autū o le Kerisiano, e tatau ona tuu atu ia Ieova, lona Atua.—Sala. 140:1, 4.