Sauniga e Faatupu ai le Maelega i Galuega Lelei
1 O vala tāua e lua o la tatou tapuaiga, o le auai i sauniga a le faapotopotoga ma le faia o se sao i le auaunaga i le fanua. E galulue soosoo tauau vala ia e lua. E taaina e le tasi le isi. O sauniga faa-Kerisiano e faatupu ai le maelega i galuega lelei, o le vala aupito sili ona lelei o le talaʻiina lea o le tala lelei o le Malo ma le galuega o le faia o soo. (Epe. 10:24) Afai e tatou te lē auai i sauniga, atonu o le a lē pine ae tatou lē toe talaʻi auā o le a lē faatupuina ia i tatou le maelega e faia ai faapea.
2 I sauniga faalevaiaso, e tatou te maua ai faatonuga faaleagaga ua fuafuaina e uunaia ai i tatou e talaʻi. E faamamafa mai ai pea ia i tatou le faanatinati o le taimi, ma uunaia ai i tatou e folafola atu i isi le feau faasaoola a le Tusi Paia. Ua faalaeiauina ma faamalosia ai i tatou ina ia tumau i le galuega talaʻi. (Mata. 24:13, 14) E ala i le faaaogaina o avanoa e faia ai se tali i sauniga, o le a fai ai ma a tatou masani le faailoa atu o lo tatou faatuatua i isi. (Epe. 10:23) O le tusia o lou igoa i le Aʻoga o le Faiva Faatiokarate, ua toleniina ai i tatou ina ia avea o ni faifeau e sili atu ona uigā ma faaleleia ai lo tatou tomai e aʻoaʻo atu.—2 Timo. 4:2.
3 Le Auala e Faatupu ai e Sauniga lo Tatou Maelega e Talaʻi: Ua faalaeiauina i tatou uma lava ina ia muai tilofaia i se taimi o mamao le mataupu i La Tatou Faiva o le Malo. Ona tamau ai lea i o tatou mafaufau lenei faamatalaga a o tatou auai i le Sauniga o le Auaunaga ma vaai ai i faataitaiga o loo faatinoina mai i le pulelaa. Pe a auai i le auaunaga i le fanua, e mafai ona tatou toe manatunatu i La Tatou Faiva o le Malo ma manatua ai faataitaiga na faia ai, ma i lea, e mafai ai ona avatu se molimau e sili atu ona uigā. O le mea lena na tofo i ai le toatele o le au talaʻi.
4 I le tuliloaina o Faatasiga mo le Auaunaga, ua faia ai e nisi ni fuafuaga ma isi ina ia auai faatasi i le faiva. O loo manatua lelei pea e le au talaʻi manatu e talafeagai mo le faiva i le fanua, ma ua faagaeetia ai i latou i le fia faailoaina atu o nei manatu, ona sa faalaeiauina ai i latou i nei sauniga ina ia faia se sao i le galuega talaʻi i vaiaso taitasi.
5 E leai se mea e tutusa ma a tatou sauniga faa-Kerisiano, o iina e tatou te auaufaatasi ai ma o tatou uso tapuai ma ua faatupu ai ia i tatou le maelega mo galuega lelei. Pe afai tatou te mananao ia tupu olaola la tatou faiva, e tatau ona tatou auai e lē aunoa i sauniga a le faapotopotoga. Seʻi o tatou faaalia le talisapaia mo lenei sauniuniga matagofie mai ia Ieova e ala lea i le “aua le lafoaiina le faapotopotoina o i tatou.”—Epe. 10:25.