O Tagata Matutua e Lē Mapu i le Talaʻi Atu
1 A o faasolo ina avea ma tagata matutua, o le toatele lava e tepa taulai atu i le taimi o le a mālōlō ai mai a latou galuega totogi sa iai, ma olioli ai i se olaga saoloto mai tiute tauave i tausaga o totoe o o latou soifuaga. Atonu e latou te lagona e faapea, ua lava a latou galuega mamafa ma ua tatau nei ona latou mālōlō. Pe atonu foi ua latou mananao e tau lava ina olioli i tausaga o totoe o o latou olaga.—Luka 12:19.
2 I le avea o ni auauna tuuina atu a Ieova, e ese ai la tatou vaaiga i le olaga. Ua tatou iloa e tatou te lē mālōlō mai le auaunaga a le Atua. E mautinoa lava la tatou vaaiga, auā o loo tatou ‘faatalitali atu i le ola e faavavau.’ (Iuta 21) O le tele o tausaga o le mauaina o le poto ma le poto masani, e mafai ona faaleleia ai le faautauta ma le malamalama o se tagata. O lenei mea ua mafai ai e se tasi ona sili atu ona atamai ma sili atu ona paleni ma faaalia ai le matuā talisapaia mo le ola. O nei uiga uma, ua mafai ona agavaa lelei ai se tasi e avea ma faifeau o le tala lelei.
3 O le agaʻi ina matua, e lē na o se faafitauli o le faasolo ina tele tausaga i le tulaga faaletino; e aafia ai foi ma uiga faalemafaufau o se tasi. Afai e te faatalitalia e te ola mo se taimi umi ma e tauivi ina ia tumau pea ona talavou lou mafaufau, e mafai ona faateleina avanoa e te faia ai na mea uma. E mafai e tagata matutua ona faatamaoaigaina o latou olaga e ala i le faateleina o lo latou poto faaleagaga ma tufa atu ai i isi.—1 Kori. 9:23.
4 Faaaoaoga o Mea Moni na Tutupu: I le 86 o tausaga, na faapea mai ai se tasi tuafafine: “Pe a ou mafaufau atu i le 60 tausaga ua mavae talu ona ou aʻoaʻoina le upu moni, e mapuna aʻe ai pea i loʻu loto le folafolaga mautinoa a le Atua. Ioe, o le a gaoioi ma le alofa faamaoni Ieova i ē faamaoni e ala i le faatagaina o i tatou e mauaina le olioli tele.” (Sala. 18:25) E manatua pea e se tasi uso matua lona matuā faanoanoa ona o le maliu o lana avā, lea na matuā faaleagaina ai lona soifua maloloina. Na faapea mai o ia: “Ae peitai, ona o le alofa tunoa o Ieova, na toe faamalosia ai aʻu i se tulaga na mafai ai ona ou ulu atu i le auaunaga paeonia ina ua mavae le lua tausaga mulimuli ane. Maeu loʻu loto faafetai ia Ieova ina ua toe faaleleia loʻu soifua maloloina faatasi ma lenei faatelega i le galuega talaʻi!”
5 O lea, e fia faamālō atu ai ona o le toatele o ē matutua ua maumauai e faaauau pea ona talaʻi i le tele e gafatia ai e o latou soifua maloloina ma le malosi—e aunoa ma le mapu! Ua ia i latou se mafuaaga lelei e faalauiloa mai ai e faapea: “Le Atua e, na e aʻoaʻo mai ia te au talu ina ou tama itiiti; ua oo mai foi i nei ona po ua ou faaali atu ou vavega.”—Sala. 71:17.