Ua Faaavanoaina le Faitotoa Lautele mo le Galuega
1 I le avea o sē talaʻi maelega o le tala lelei, na matuā filigā ai Paulo i le sailia o oganuu sa sili atu ona manaomia tele ai le fesoasoani, ma o se tasi o nei oganuu, o le aai lea o Efeso. Sa matuā taulau manuia o ia i le talaʻiga iina, o lea na ia tusi atu ai i uso Kerisiano e faapea: “Ua faaavanoa mo aʻu le faitotoa lautele mo le galuega.” (1 Kori. 16:9, NW) Sa faaauau ona auauna Paulo i lena oganuu ma fesoasoani i le toatele o tagata Efeso ina ia avea ma tagata talitonu.—Galu. 19:1-20, 26.
2 I aso nei, ua faaavanoaina ai foi mo i tatou se faitotoa lautele mo le galuega. Ua valaaulia i tatou ina ia fesoasoani atu i faapotopotoga na e lē mafai ona galueaiina maeʻaeʻa a latou oganuu i tausaga uma. I lea, o a tatou taumafaiga o le a mafai ona faafetaiaia ai le manaoga lea o loo iai i nisi o vaipanoa.—Faatusatusa i le 2 Korinito 8:13-15.
3 Pe e Mafai Ona E Auauna i Oganuu e Sili Atu Ona Manaomia ai le Fesoasoani? Po o e manatunatu faatasi ma le tatalo pe mafai ona e auauna i se isi nofoaga? Atonu e mafai lava ona e fesoasoani atu i se faapotopotoga i lau lava aai. Aisea e te lē talanoa atu ai i le ovasia matagaluega e uiga i lea mataupu ma iloa ai po o le ā sana fautuaga? Pe atonu foi e iai ni tagata se toatele e logonoa po o nisi foi e tāutala i nisi gagana i le oganuu a la outou lava faapotopotoga e lei mafai lava ona galueaiina e se tasi. Ina ia faafetaiaia lenei manaoga, pe mafai ona e faamalosia oe lava e aʻoaʻoina la latou gagana? E lē gata i lea, pe atonu foi o loo iai se isi vaega po o se faapotopotoga o latalata ane e tāutala i se isi gagana, o ē atonu o loo ‘aioi atu i le Matai mo nisi tagata faigaluega o le Malo.’ (Mata. 9:37, 38) Afai e iai, pe e mafai ona e fesoasoani atu i ai?
4 I le faitau sefulu o tausaga ia faatoʻā mavae atu, e faitau afe aiga Kerisiano na siitia atu i isi atunuu ina ia faia ai se sao atoatoa i le galuega o le seleselega. Na faapea mai se tasi ulugalii na la faia faapena: “Sa ma mananao e auauna ia Ieova i le mea sa mafai ona ma avatua ai le tele o le fesoasoani.” Afai o lou faanaunauga lena ma iloa e mafai ona e siitia atu i se isi nofoaga, po ua e agavaa foi e auauna i se isi atunuu, ia muai talanoaina au fuafuaga ma toeaina o lau faapotopotoga.
5 Afai e te manao e fesili atu i le Sosaiete e uiga i se nofoaga o iai se manaoga mo se fesoasoani, ia faailoa atu i le Komiti o le Auaunaga a le Faapotopotoga e ala i se tusi, e otooto atu ai lou manaoga patino. Ona faapipii faatasi lea o lau talosaga ma sa latou fautuaga ma aauina atu i le Sosaiete. Po o le ā lava le tulaga, afai o loo avanoa pea le faitotoa lautele mo le galuega, seʻi faaauau pea ona tatou pisi uma i le auaunaga ia Ieova.—1 Kori. 15:58.