Ia Aapa Atu i Paaga e Lē o ni Molimau
1 O se mea e matuā olioli tele ai pe afai e aufaatasi ulugalii faaipoipo i le tapuaiga moni. Ae peitai, i le tele o aiga, e na o le toatasi o se paaga faaipoipo ua talia le ala o le upu moni. E mafai faapefea ona tatou aapa atu i nei paaga e lē o ni Molimau ma faalaeiauina i latou ina ia tatou tapuai faatasi ia Ieova?—1 Timo. 2:1-4.
2 Ia Malamalama i o latou Manatu: E ui lava atonu e tetee nisi o paaga e lē ni Molimau, o le faafitauli masani lava, o le feeseeseai o manatu po o le lē femalamalamaai. Atonu e lagona e se tagata e faapea ua lē amanaia o ia, pe fuā foi ona o le faatuatuaga fou faaleagaga o lana paaga. E manatua ai e se tasi tane e faapea: “I le tuua na o aʻu i le fale, na ou lagona ai e pei ua tuulafoaiina aʻu.” Fai mai le tasi tane: “Sa ou lagona e pei ua tuulafoaiina aʻu e laʻu avā ma le fanau.” E ono manatu nisi tamaloloa e faapea, ua mālō le lotu i o latou aiga. (Tagai i le Watchtower o Aokuso 15, 1990, itulau 20-23.) O le pogai lena e sili atu ai ona lelei pe afai e mafai ona faaaofia le tane faatasi ma lana avā i le suesuega faale-Tusi Paia a le aiga mai lava i le amataga.
3 Ia Galulue o se ‘Au: Sa maua e se tasi ulugalii Molimau ni iuga lelei i lo la galulue faatasi e fesoasoani atu i tagata ua uma ona faaipoipo e maua le upu moni. Ina ua uma ona amataina e le tuafafine se suesuega ma le avā, ona asiasi atu lea o le uso i le tane. E pei lava ona masani ai, sa mafai ona ia amataina se suesuega ma le tane.
4 Ia Faaleuo ma ia Agalelei: E mafai e aiga i le faapotopotoga ona fesoasoani i le faaalia o le naunau i aiga e lei aufaatasi mai i le tapuaiga moni. O ni nai asiasiga faaleuo atonu o le a mafai ona fesoasoani i se paaga e lē o se Molimau e iloa ai o Molimau a Ieova o ni Kerisiano e mafana, ma e manatu mamafa mo le lelei o tagata uma.
5 E mafai e toeaina ona autaluina mai lea taimi i lea taimi ni taumafaiga na faia talu ai nei ina ia oo atu ai i paaga e lē o ni Molimau, ma faia ai se faaiuga po o ā nisi o mea e mafai ona faia atili ma le faamoemoe ia maua mai i latou mo Ieova.—1 Pete. 3:1, faamatalaga i le pito i lalo o le mau i le NW.