Afai o Maua ai ni Iuga Lelei, ia Faaaogā!

¹ O loo saunia pea mo i tatou i La Tatou Faiva o le Malo taulimaga eseese ua fautuaina mai mo le faaaogaina i la tatou faiva. Ua aumaia ai ia i tatou e nei mea ni manatu fou i le auala e atiina ae ai le naunau fiafia i le feau o le Malo. E foliga mai e tatau ona e faia se taumafaiga i masina taitasi e aʻoaʻo se tasi pe sili atu foi o nei taulimaga. Ae peitai, ua iloa e nisi tagata talaʻi e faapea, e lē umi se taimi latou te faaaogā ai se tasi o nei taulimaga, ae ua aumaia foi ni taulimaga fou i le isi lomiga o La Tatou Faiva o le Malo. E manino lava, atonu e lē mafai e tagata uma ona aʻoaʻoina se taulimaga fou a o lei agavaa i le faaaogaina o lea na muamua mai.

² O le mea moni, o loo iai le faitau afe o paeonia ma isi tagata talaʻi o loo faaaluina le tele o le taimi i le auaunaga i le fanua. E lē gata i lea, e tele faapotopotoga e na o ni nai vaiaso lava e galueaiina ai a latou oganuu atoa. I nei tulaga, e talisapaia ai e tagata talaʻi ia faafeiloaiga ma manatu fou mo le moliooina atu o le feau. Ua fesoasoani lenei mea ia i latou e faateleina ai o latou tomai. Ua faapea foi ona avea ai la latou faiva o se mea e sili atu ona fiafia ai ma fuatele mai, ma e fesoasoani foi ia i latou e feagai ai ma luʻi o loo latou fetaiai.

³ Po o le ā lava le tulaga, afai ua e sauniunia se taulimaga ua aogā lelei i le atiina ae o le naunau fiafia, afai o taulau manuia, ia faaauau pea ona faaaogā! E lē o se mea tatau ona taofia le faaaogaina o se taulimaga uigā lena o loo maua ai ni iuga lelei. Ia tau lava ina faafesootai atu ma le lomiga o loo ofoina i lena masina. A o e autaluina fautuaga o loo aumaia i La Tatou Faiva o le Malo, ia vaavaai mo ni manatu faaoso naunau atonu o e manao e faaaofia i lau taulimaga.

⁴ O lea, pe a e mauaina se lomiga fou o La Tatou Faiva o le Malo, ia manatua, o taulimaga o loo iai, ua na o ni fautuaga. Afai e mafai ona e faaaogā, e lelei. Ae afai ua uma ona iai sau lava taulimaga ua maua ai ni iuga lelei i lau oganuu, ia faaaogā lena! O le mea tāua, o le “matuā faaiuina [o] lau faiva” i se auala lelei, i le sailia o ē ua tatau ai ma fesoasoani i ai ina ia avea i latou ma soo.—2 Timo. 4:5.