Ofoina o Mekasini Lea e Molimauina le Upu Moni
1. O le ā le mea o loo faia e le Olomatamata ma le Ala Ma!?
1 O loo tumau pea ona avea Le Olomatamata Faasilasilaina le Malo o Ieova ma lona soa le Ala Mai! ma vala autū o le talaʻia o le Malo ma le faia o isi ma soo. (Mata. 24:14; 28:19, 20) E tatou te fiafia tele i le ofoina o nei mekasini e fetaui ma le taimi, a o tatou auai i vala eseese o le auaunaga o le Malo.
2. O ā suiga ua faia i Le Olomatamata ma le Ala Mai!, ma aiseā?
2 O loo tatou vaaia suiga a o faagasolo tausaga i le telē, faapea ma mataupu o faaaogā i nei mekasini, ma le auala e tufatufaina ai. Ua faia na suiga ma le fuafuaga ina ia logolelei ma aogā, ma mafai ai e le feʻau o le Malo ona pāʻia loto o “tagata uma lava, ma ia oo ina iloa lelei le upu moni.”—1 Timo. 2:4.
3. O le a faapefea ona faaaogā mekasini i le talaʻiga?
3 Talu mai lava Ianuari 2006, ua tatou masani i le faaaogāina o taulimaga eseese e ofo ai le mekasini o le Ala Mai! Ae o Le Olomatamata Faasilasilaina le Malo o Ieova, e lua kopi e maua i le masina, ae e na o le tasi e ofoina i tagata lautele, ma faaaogā ai taulimaga eseese. O le a maua i le pito i tua o La Tatou Faiva o le Malo, ia taulimaga ua saunia mo nei mekasini. E ui e masani ona faamatilatila i na taulimaga ia mataupu amata o loo i nei mekasini, ae i nisi taimi e mafai ona faaaogā isi mataupu o loo tele ina fiafia i ai tagata. E mafai ona taulau le faaaogāina o taulimaga ua saunia mai pe a tatou faamasani i le mataupu o le a faamatilatila, ma ia faaaogā a tatou lava upu e fetuunaʻi ai taulimaga e tusa ma le oganuu.
4. Aiseā atonu e aogā ai le faaaogā o nisi taulimaga e ese mai taulimaga lea e i La Tatou Faiva o le Malo?
4 E mafai ona faaaogā se isi taulimaga, e ui lava o loo aumaia i La Tatou Faiva o le Malo taulimaga e lua mo mekasini taʻitasi. O se tasi o māfuaaga o le faia faapea, atonu o loo iai isi mataupu e fiafia i ai tagata o lau oganuu. Po o lou manatu foʻi e mafai ona e faia se taulimaga e taulau pe a e faaaogā se isi mataupu e te fiafia i ai.
5. O le ā e ao ona e faia a o leʻi saunia le taulimaga mo le mekasini e faaaogā?
5 Le Auala e Saunia ai Lau Taulimaga: Muamua, e ao ona e masani lelei i le mataupu o le a e filifili e faamatilatila. Atonu e lē mafai ona e masani i mataupu uma i le mekasini a o leʻi tufaina i le galuega talaʻi. Ae e tatau ona e matuā naunau moni i le mataupu ua e filifili e faaaogā. E mafai ona e faia lenā mea pe afai ua e faamasani i faamatalaga o le a e faamatilatila.
6. E faapefea ona saunia a tatou lava taulimaga?
6 O le isi auala, o le fetuutuunaʻi lea o au upu tomua. Atonu e mafai ona faaaogā se fesili faaoso naunau e fesootaʻi ma le mataupu, ina ia amata ai se talanoaga. Ia faalagolago pea i le mana o le Afioga a le Atua e pāʻia ai loto o tagata. (Epe. 4:12) Ia filifili se mau talafeagai e fesootaʻi ma le mataupu ua faatomua atu, aemaise se mau o loo sii po o loo faamatala mai i le mataupu. Ia e iloa pe faapefea ona fesootaʻi le mau ma le mataupu.
7. E faapefea ona faaleleia atili a tatou taulimaga?
7 I so o se Avanoa: E ao ona faaaogā taulimaga ina ia mafai ona aogā. Ia auai i le mekasini a le faapotopotoga i Aso Toonaʻi, ma faataʻitaʻi ai na taulimaga. Ia ofo atu mekasini iā i latou na talia muamua a tatou lomiga. Ia faaauau pea ona ofo mekasini i lau tagata aʻoga o le Tusi Paia, faapea isi e ono maua atu i le taimi o le toe asiga. Atonu e mafai ona e tuu mekasini iā i latou na e talanoa i ai a o fai sau faatau, pe faimalaga foʻi, po o le taimi foʻi e faatali ai mo le fomaʻi. Ia faaleleia atili taulimaga a o faaaogā i le masina atoa.
8. O ā auala e lē mafaatusalia ai Le Olomatamata ma le Ala Mai!?
8 E lē mafaatusalia Le Olomatamata ma le Ala Mai! auā e faasilisilia ai Ieova o le Silisili ese i le lalolagi uma. (Galu. 4:24) E faamāfanafanaina e nei mekasini ia tagata i le tala lelei o le Malo o le Atua, ma faamalosia le faatuatua iā Iesu. (Mata. 24:14; Galu. 10:43) E lē gata i lea, e faamanatu mai e nei mekasini mea o loo tutupu i le lalolagi lea ua faataunuu ai valoaga o le Tusi Paia. (Mata. 25:13) O lou sauni e ofo atu nei lomiga i tagata taʻitoʻatasi i lau oganuu i so o se avanoa, o le a e fesoasoani ai iā i latou e maua aogā mai nei mekasini.
9. E faapefea ona e faia se faavae mo se toe asiga?
9 Pe a e taulau i le ofoina o nei mekasini, po o le faatoʻā amata foʻi o se talanoaga māfana ma se tasi i se mataupu faale-Tusi Paia, ia sauni e faatū se fesili po o se manatu faaoso naunau e mafai ona tali i le toe asiga ma faaauau ai le talanoaga. O lo tatou maelega i le lūlūina o fatu o le upu moni, e tatou te mautinoa ai o le a tatalaina e Ieova loto o ē matuā naunau e fia iloa ma auauna iā te Ia.—1 Kori. 3:6.