Fanau e—O Outou o lo Matou Olioli!
1 Tama e, ma teine talavou, po o tou masani lelei ma le poloaiga a Ieova ina ia faaaofia outou i gaoioiga a le faapotopotoga? (Teu. 31:12; Sala. 127:3) O se mea e olioli tele ai lo outou iai faatasi ma i matou a o tatou tapuai faatasi atu ia Ieova! E tou te matuā faamafanafanaina o matou loto pe a outou nonofo fifilemu i sauniga ma faalogologo lelei. O se mea e matou te matuā fiafia faapitoa ai lava pe afai tou te taumafai e faia se tali i a outou lava upu. E faafiafiaina le faapotopotoga atoa pe a faia a outou vaega tofia i le Aʻoga o le Faiva Faatiokarate, pe a outou naunau e auai ma i matou i le auaunaga i le fanua, ma pe a matou faalogo atu o tou molimau atu ma le loto tetele i ē tou te aʻoʻoga faatasi ma faiaʻoga.—Sala. 148:12, 13.
2 E matou te mananao ina ia outou iloa e matou te mitamita ona o outou pe a matou vaaia a outou amio lelei, o outou laei onomea, a outou amio mamā, ma lo outou faaaloalo i tagata matutua. E matuā sili lava ona matou olioli faapitoa pe a outou faaalia o loo outou ‘manatua Lē Sili na Faia outou’ e ala i le faataatitia o sini faatiokarate mo outou.—Fai. 12:1; Sala. 110:3.
3 Ia Faailoa Mai ia i Matou o Outou Sini: Na faailoa atu e se tasi tama e valu tausaga le matua i le ovasia itumalo e faapea: ‘Muamua lava, ou te manao ina ia ou papatiso, ona sosoo ai lea ma loʻu manao ou te auauna i le faapotopotoga e ala i le fesoasoani atu i le faiga o mea faaleotele leo, feaveaiina o mea faaleotele leo, i le avea o sē tautua, fesoasoani i le taulimaina o tusi, faitau i suesuega tautusi ma Suesuega o Le Olomatamata. Ona sosoo ai lea ma loʻu manao e avea aʻu o se auauna o le faiva, ona avea ai lea o se toeaina. Ou te manao foi e avea aʻu o se paeonia ma ou auai i le aʻoga a paeonia. Ou te manao foi ou te alu i Peteli, avea o se ovasia matagaluega po o se ovasia itumalo.’ Maeu se talisapaia lelei na ia faaalia mo le faaeaga o le auauna atu i le Atua!
4 A o outou agaigai i luma faaletino ma faaleagaga, matou te olioli i le vaai atu ua outou ausia o outou sini. (Faatusatusa i le Luka 2:52.) I tausaga taitasi, o le faitau afe o outou ua oo ina avea ma tagata talaʻi e lei papatisoina ma oo foi ina agavaa mo le papatisoga i le avea o ni auauna tuuina atu a Ieova. E tupu tele lo matou olioli pe a oo ina sosoo ai ma le aapa atu i le paeonia lagolago ma oo lava ina ulu atu i le auaunaga faataimi atoa. Le fanau e, e moni lava, o outou o lo matou olioli ma o se puna matagofie o viiga i lo tatou Tamā faalelagi. Tau ina ia sasaa atu e Ieova le oa o faamanuiaga ia te outou!—Faata. 23:24, 25.