‘Ia Faia Pea le Mea Nei e Fai ma Faamanatuga ia te Au’

¹ O tagata ua tauāu ina latou faamatuu atu le uiga aogā o mataupu tāua e galoma atu a o mavae atu taimi. O le tasi lenei o mafuaaga na poloai ai Iesu i ona soo ina ua faavaeina “le talisuaga [“afiafi,” NW] a le Alii,” e faapea: ‘Ia faia pea le mea nei e fai ma faamanatuga ia te au.’ Talu mai ai lava lena taimi, i le faamanatuina o le maliu o Iesu, ua usiusitai ai pea Kerisiano e “faailoa atu ai le maliu o le Alii seia afio mai o ia.”—1 Kori. 11:20, 23-26.

² O lenei ua lē o toe umi lava se taimi, ae talia loa e Iesu i le afioaga faalelagi ia sui mulimuli o le vaega totoe o le “lafu mamoe itiiti” ua faaitiitia. (Luka 12:32; Ioa. 14:2, 3) I le tausaga lenei, o le a toe maua ai foi e le vaega totoe o ē faauuina faatasi ma le motu o tagata e toatele o “isi mamoe” ua faatoateleina, le faaeaga o le faamanatuina lea o le Talisuaga Afiafi a le Alii, ia Aperila 11. (Ioa. 10:16; Faaa. 7:9, 10) O le a faamalosia ai le talisapaia mo le alofa tele o Ieova i le auina mai o lona Alo pele e toatasi e fai ma sui o le fanau a tagata. O le a faamatilatilaina ai le faaaoaoga a Iesu, o lona alofa, lona faamaoni e oo i le oti i le saunia o le togiola, ma lona pule nei e avea o se Tupu i le Malo ua faavaeina o le Atua, faapea ma faamanuiaga o le a aumaia e le Malo i le fanau a tagata. O se sauniga moni lava lenei e faamanatu ai!

³ Ia Sauniuni Nei: Seʻi o tatou faia uma ni taumafaiga malolosi ina ia avea ai lenei vaitaimi o le Faamanatuga o se taimi e olioli tele ai ma loto faafetai mo i tatou lava ma i latou uma o le a auaufaatasi ma i tatou. E mafai ona saunia o tatou loto e ala i le toe faitauina o faamatalaga i le Tusi Paia e faatatau i nai aso mulimuli o le faiva a Iesu ma mea na tutupu seia oo atu i lona maliu. I la tatou suesuega faaleaiga i nai vaiaso a o lei oo i le Faamanatuga, e mafai ona taulai faapitoa atu i le autaluina o le mataupu e 112-116 o le tusi o le Tagata Silisili.

⁴ Faamata e te iloa pe toafia nisi atonu o le a ō mai i le Faamanatuga pe afai e te tausolomua i le atiaeina o lo latou talisapaia mo lenei sauniga, i le valaaulia ma faamautinoa atu ia i latou o le a talia ma le fiafia lo latou auai mai? Fai nei sau lisi, ma fai le mea e te mafaia e fesoasoani ai ia i latou ia ō mai. I se taimi mulimuli, ona fesoasoani lea ia i latou ina ia tutupu aʻe pea faaleagaga i le faalaeiauina o i latou ia auai e lē aunoa i sauniga.

⁵ I le vaitaimi o le Faamanatuga, o le a faia ai ni fuafuaga faapitoa ina ia faateleina ai avanoa o tagata uma e talaʻi ai. I le faia o se faasologa lelei, pe mafai ona e paeonia lagolago ia Aperila po o Me? O se tasi o auala aupito sili ona lelei e faaalia ai o loo tatou manatuaina ma le talisapaia le uiga o le taulaga ua faia e Iesu mo i tatou, e ala i le talanoa atu e uiga i lo tatou Atua o Ieova, ma faamanuiaga o le a aumaia e lena Malo ua pulea e lona Alo.—Sala. 79:13; 147:1.