E Manaomia i Tatou Uma Ina ia Faamaeʻaina ai le Galuega

¹ E ao i soo uma lava o Iesu Keriso ona malamalama e faapea, o ana taumafaiga e lagolagoina ma faia se sao i le galuega talaʻi o le Malo, e matuā tāua lava. Sa silafia lelei lava e Iesu e faapea, o le a fuaina mai e ona soo ni fua o le Malo i auala eseese e tele. (Mata. 13:23) E ui lava o se vaega tele o le galuega talaʻi o loo tauaveina e le toatele o paeonia galulue mamafa, ae e ao foi ona faamālō atu ia i latou uma o ē o loo faaauau pea ma le naunautai ina ia faamamaluina le Atua e ala i le fuaina mai o ni fua i le tele latou te mafaia.—Ioa. 15:8.

² O le Pulupululima Faatasi e Tele ai Mea e Mafai Ona Faataunuuina: Na valoia e Iesu e faapea, o le pulupululima faatasi o ona soo uma, o le a mafai ai ona faia galuega e sili atu i lo o galuega na ia faia. (Ioa. 14:12) E tusa lava po o tatou tulaga totino ua faatapulaa ai mea e mafai ona tatou faia, pe e mafai ai foi ona tatou tuuina atu le tele o le taimi i le talaʻiga o le Malo, ae manaomia i tatou uma lava ina ia faataunuuina ai le galuega. E pei lava ona taʻua e Paulo e faapea: “O le tino uma lava ua faafesootaia lelei faatasi, ma ua faia ina ia felagolagomai e ala i sooga taitasi ina ia maua ai le mea e manaomia, e tusa ma le fua o gaoioiga a itu tino taitasi, ma iu ina atiina ae ai le tino atoa.”—Efeso 4:16, NW.

³ Atonu e lagona e nisi faapea, e lē o tele se mea o latou mafaia. Ae peitai, i le silafaga a Ieova, o le mea tāua o la tatou auaunaga ia faia ma le loto atoa. O mea uma lava tatou te faia mo ia e matuā tāua ma talisapaia.—Faatusatusa i le Luka 21:1-4.

⁴ Ia Faaauau Ona Lagolagosua i le Galuega: Ua maua e i tatou uma lava le faaeaga e faia ai se foai tauofo faaletino mo le galuega i le lalolagi aoao. Ua mafai foi e nisi ona fesoasoani e ala i galuega faaletino o loo aafia ai e lagolagoina ai le galuega o le Malo. E mafai e tagata taitoatasi ona taumafai e avatu ni tali sauniunia lelei i sauniga ma faia se sao i le Aʻoga o le Faiva Faatiokarate. I le faaaogaina o avanoa e faalaeiauina ai isi, ua tatou faia ai se meaalofa tautele mo le lelei faaleagaga o le faapotopotoga, ma fesoasoani foi e faaleleia ai le tomai o le faapotopotoga e faataunuuina le galuega ua tofia atu i ai.

⁵ Ioe, e manaomia i tatou uma lava ina ia faamaeʻaina ai le galuega. E lē tatau i se tasi ona iai se lagona e faapea, e lē manaomia o ia. O a tatou taumafaiga soosoo tauʻau, pe tele pe itiiti i le auaunaga ia Ieova, ua iloga ai i tatou, ua na o le pau ia o tagata tapuai moni o le Atua. (Mala. 3:18) E mafai e i tatou taitoatasi ona faia se sao uigā i le faamamaluina o Ieova ma fesoasoani i isi ina ia iloa o ia ma auauna atu i ai.