Se Mea Ina a Lelei o le Auai Pea!
1 Mo le faitau sefulu o tausaga i Europa i Sasaʻe, o le toatele o o tatou uso pele sa faasāina ona faapotopoto mo ni faatasiga faitele. Ae seʻi manatu i lo latou olioli ina ua tatalaina faasasaaga ma mafai ai ona latou saʻoloto e faapotopoto faatasi!
2 E faatatau i sana asiasiga i se tasi o faapotopotoga faapena, na tusia ai e se ovasia matagaluega e faapea: “I le po o le Aso Lua, i le amataga lava o laʻu asiasiga, na leaga ai le masini faamafanafana. I fafo, sa matuā mālūlū lava, ma i totonu, sa na o le 40 tikerī Fahrenheit [5° C]. Sa nonofo pea uso o loo ofu o latou ofu tetele mafanafana, sikafu, fai totini lima, pulou taumata, ma seevae uumi. E leai se tasi na mafai ona suʻeina se mau o le Tusi Paia, talu ai sa lē mafai ona suʻe itulau o tusi. I le tulai atu i luga o le pulelaa ma loʻu suti, na ou lagona loʻu matuā maalili i le mālūlū, ma o taimi uma lava ou te tautala ai, sa mafai ona ou iloa atu le asu o laʻu mānava. Ae o le mea na ou matuā maofa ai, ona e leai lava se upu e tasi o se faitioga na ou faalogoina. Na faapea uma mai lava uso, maeu le lelei ma le matagofie o le auai!” E lei manatu lava se tasi o na uso e misia lena sauniga!
3 Pe Faapena ea lo Tatou Lagona? Pe tatou te faapelepele ea i le avanoa e faapotopoto ai ma le saʻoloto i a tatou sauniga faalevaiaso? Po o le mea ea o tatou manatu māmā i sauniga pe a oo ina sologa lelei le tulaga o mea? Atonu e lē faigofie le auai e lē aunoa i sauniga, ma atonu e iai ni taimi e iai ni mafuaaga tatau mo le lē auai. E ui i lea, aua lava neʻi galo e iai foi isi o ia i tatou e ui lava ina oo i le olaga o le tagata matua, iai faafitauli matuia o le soifua maloloina, lē atoatoa le tino, feomai le faasologa tau i le galuega, ma isi tiute tauave mamafa, ae latou te iloa lava le tāua o sauniga ma e seāseā lava misia se sauniga. Maeu ni faaaoaoga lelei mo i tatou e faataitai i ai!—Faatusatusa i le Luka 2:37.
4 Seʻi fai ma a tatou masani le lagolagoina o le tapuaiga moni e ala i le auai i a tatou sauniga faa-Kerisiano uma lava, mai i se suesuega tautusi toagaogao a vaega e oo i tauaofiaga tetele. Aisea tatou te manatu mamafa ai e auai i nei faatasitasiga? Auā o le faatonuga tauatua ina ia tatou faapotopoto faatasi. Ae e iai foi isi mafuaaga tāua. E manaomia e i tatou uma lava le aogā o faatonuga tauatua ma le fesoasoani a le agaga paia, lea e maua i sauniga. (Mata. 18:20) E atiina ae i tatou e ala i feofoofoaiga o faalaeiauga pe a auaufaatasi ma o tatou uso.—Epe. 10:24, 25.
5 I le faaliliuina o Iesu, na faapea atu ai Peteru, “Le Alii e, e lelei ona ua tatou iinei.” (Luka 9:33) E ao foi ona ia i tatou lena lagona e faatatau i a tatou sauniga faa-Kerisiano uma. O le mea moni, maeu se mea ina a lelei o le auai pea!