Molimau Atu i “Tagata Uma Lava”
1 Pe a tatou feiloai ma tagata e eseese aganuu po o talaaga faalotu, ona tatou manatua lea, e finagalo Ieova “ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) E faaopoopo atu i le tele o sāvali ma polosiua ua saunia faapitoa, ua ia i tatou foi ni lomiga e sili atu ona lelei se lua e mafai ona faaaogā i so o se taimi, e fesoasoani atu ai i tagata o ē e lei aʻoaʻoina e a latou lotu i le upu moni e uiga i le Atua ma Keriso.
2 Ua iloatino e Kerisiano faapea foi i latou e lē o ni Kerisiano e faapea, o Iesu Keriso sa avea o se peresona na tele ni ana taaʻiga i le faagasologa o talafaasolopito. E ala i le faamatilatilaina o lona soifuaga, ua mafai ai e le tusi, Le Tagata Silisili o Ē Uma na Soifua Mai ona fesoasoani i se tagata ina ia masani lelei i le Alo o le Atua ma ia tosina atu ai ia te ia, e pei ona iai le toatele o tagata i le uluai senituri. (Ioa. 12:32) I le isi itu, ua aumaia e le tusi o le Mankind’s Search for God se malamalamaga i le amataga mai o lotu tetele a le lalolagi ma ua mafai e lena mea ona fesoasoani ai i tagata i so o se vaipanoa ina ia latou faia se faatusatusaga i le va o o latou talitonuga ma mea o loo aʻoaʻo mai e le Tusi Paia e faatatau i le Atua moni e toatasi. I le masina nei, o le a tatou faatomua atu ai le tusi o le Tagata Silisili, ae afai tatou te feiloai ma tagata o ē faitau i le gagana faa-Peretania, atonu tatou te mananao e faasino ia i latou le tusi o le Search. O nisi nei o fautuaga mo le faailoaina atu o nei tusi.
3 A o e ofoina atu le tusi o “Le Tagata Silisili,” e mafai ona e fesili atu:
◼ “O le ā se mea e te manatua pe a e mafaufau e uiga ia Iesu Keriso? [Faatali mo se tali.] E toatele tagata tusitala o le talafaasolopito ua latou faailoa mai e faapea, o Iesu, o le tagata silisili lea o ē uma na soifua mai. [Fai i ai se faataitaiga mai upu tomua o le tusi, Le Tagata Silisili.] Ua faailoa mai e le Tusi Paia e faapea, o le soifuaga o Iesu sa avea o se faaaoaoga lelei e tatau ona tatou faataitai i ai.” Faitau le 1 Peteru 2:21 ma le palakalafa muamua o le itulau faaiu o le faatomuaga o le tusi, Le Tagata Silisili. Pe afai e naunau le tagata e ona le fale e fia aʻoaʻo atili e uiga ia Iesu, ona ofo lea o le tusi. Ae e te lei tuua le fale, faitau le Ioane 17:3 ma fesili i ai, “E mafai faapefea ona tatou maua lenei poto e taitaia ai i le ola e faavavau?” Ia fai ni fuafuaga maʻoti e toe foi atu e tali le fesili.
4 Pe a e toe foi atu e faamalamalama le auala e ave ai i fale le poto lea e maua ai le ola, e mafai ona e faapea atu:
◼ “Sa ou folafola atu ou te toe foi mai e faailoa atu ia te oe pe faapefea ona ta maua le poto lea e taitaia ai i le ola e faavavau.” Faaali le tusi o Le Poto, ma faaaogā le mataupu muamua e faataitai ai le faia o se suesuega.
5 Afai e faapea mai le tagata e ana le fale o ia o loo i le lotu Kerisiano, e mafai la ona e faatomua atu le tusi o “Le Tagata Silisili” i le faatomuaga lenei:
◼ “O le toatele o tagata talavou o loo latou vaavaai atu mo ni tagata taʻutaʻua e faataitai i ai, ae ua faigata lava ona maua ni tagata lelei. Na faataatia e Iesu Keriso le faaaoaoga e atoatoa ona lelei mo tagata taitoatasi. [Faitau le 1 Peteru 2:21.] Na faaautū lona soifuaga atoa i le tapuaiga i lona Tamā faalelagi. O le ā sou manatu i se mea na semanū e iai pe ana toatele ni tagata e taumafai e faataitai atu ia te ia?” Tuu atu le avanoa mo se tali. Faasino i le palakalafa lona tolu i le itulau o loo sosoo ma le itulau mulimuli o le tusi, lea e faamatala mai ai ona uiga faapitoa. Ia faamatala le auala e mafai ai e le tusi o Le Tagata Silisili ona fesoasoani ia i tatou uma ina ia avea o ni Kerisiano e sili ona lelei.
6 Pe afai e talafeagai ona ofo le tusi o le “Mankind’s Search for God,” e mafai ona e fesili atu:
◼ “I le anoanoai o lotu eseese i aso nei, pe sa e tau mānatu ea po o le a mafai faapefea ona tatou iloa po o lē fea lotu ua faamaonia e le Atua?” Pe a uma ona tali mai, suʻe le tusi Mankind’s Search for God i le itulau e 377. Ia faamatilatila le manatu lona 7, ma fesili i lē ona le fale pe ioe i le manatu e faapea, o le lotu moni e tatau ona aufaatasia ai ituaiga uma o tagata. Faitau se tasi o mau o loo taʻua ai, ma a lava le taimi, ona talanoa lea i nisi manatu o loo i le lisi. Afai e faaalia le fiafia moni, ofo i ai le tusi. Pe a e tuua le fale, e mafai ona e fesili atu, “E ao faapefea i le lotu moni ona aafia ai amioga a se tagata?” Fuafua mo se toe asiga e taliina le fesili.
7 E Amataina ai ni Talanoaga: E tele lava ni fesoasoani tau aʻoaʻoga o loo iai i le tusi o le Mankind’s Search for God, na e mafai ona faaaogā e amataina ai ni talanoaga i le uluai asiasiga po o se toe asiga. E mafai ona e amataina se talanoaga i le na o le fai atu o se fesili talafeagai. Mo se faaaoaoga, ia mātau fesili nei ma mataupu ma itulau o loo faasino atu i ai:
“Questions That Require an Answer” (Fesili e Manaomia ni Tali)—itulau 17-18.
“Was Jesus a Myth?” (Po o se Talafaafagogo le Tala ia Iesu?)—itulau 237.
“Who Wrote the Bible?” (O Ai na Tusia le Tusi Paia?)—itulau 241.
“The Qur’ān and the Bible” (Le Korana ma le Tusi Paia)—itulau 285.
“Evidence of the Bible’s Authenticity” (Faamaoniga o le Saʻo Aʻiaʻi o le Tusi Paia)—itulau 340-341.
“What Jehovah’s Witnesses Believe” (Mea e Talitonu i ai Molimau a Ieova)—itulau 356-357.
“How to Identify the True Religion” (Le Auala e Iloa ai le Lotu Moni)—itulau 377.
8 E mafai ona e suʻe i itulau ua filifilia o le tusi Mankind’s Search for God ma faamatala le manatu o loo talanoaina ai. Ona faataatia lea mo se toe asiga i lou fai atu o se fesili e mafai ona e toe foi atu e taliina a lē mai le polosiua o le Manaomia ia o le tusi o Le Poto. Ia mautinoa ua valaaulia lē e ona le fale i Sauniga mo le Lautele ma tuu ai se pepa o loo faailoa atu ai le taimi o sauniga. Tuu le avanoa i tagata taitoatasi e faia ai se foai tauofo i la tatou galuega, atonu i lou faapea atu, “E fiafia lava nisi e fai se foai tauofo itiiti i la matou galuega i le lalolagi aoao.”
9 O tagata loto faamaoni uma lava o loo saili mo le upu moni e uiga i le Atua ma Keriso. E mafai ona tatou fesoasoani ia i latou e ala i la tatou galuega o le molimau atu. O lea la, seʻi faaauau ona tatou “galulue ma finafinau ai, auā tatou te faamoemoe i le Atua soifua, o ia o le Faaola o tagata uma.”—1 Timo. 4:10.