Na Tatou Maua Aogā Mai Tauaofiaga o “Le Ala a le Atua i le Ola”
1 I na o ni nai masina ua mavae, na tatou faia ai ni fuafuaga ina ia auai i Tauaofiaga Itumalo ma Faava-o-atunuu o le 1998, o “Le Ala a le Atua i le Ola.” Lea la ua avea nei na tauaofiaga ma faamanatuga tāua i le talafaasolopito faatiokarate o le faalapotopotoga. Sa tatou matuā olioli lava i meaʻai susua faaleagaga na tatou maua i na aufaatasiga mataina.
2 O le tulaga faava-o-atunuu o tauaofiaga i lenei tausaga sa avea o se mea na matuā faafiafiaina moni ai. Pe sa iai pe leai foi ni misionare ma ni sui usufono mai isi atunuu na auai i le tauaofiaga lea na tatou auai, ae na tatou faalogologo uma lava i tala o mea mananaia na tutupu i le vaega o le polokalame i le afiafi o le Aso Faraile lea na faamatuaina e faapea, “Le Auaunaga i le Faiva Faamisionare. O “Lipoti i le Agaigai i Luma o le Seleselega” i aso taitasi mai le lalolagi aoao, sa avea o se faalaeiauga sili.
3 Lomiga Fou Matagofie na Tatalaina Ai: I le lauga mulimuli o le Aso Faraile, na taliina ai se fesili o loo fesili ai pea le lē mafaitaulia o tagata o ē e lē malamalama i le upu moni e faapea: “Pe Iai se Isi Ola pe a Mavae le Oti?” Na faaiuina lena lauga sili ona faafiafia loto i le tatalaina o se polosiua fou faa-Peretania, What Happens to Us When We Die? I le taimi nei e lē taumatea ua tatou faitau uma i ai ma mafai ai ona iloa faapea, e maeu le matuā aogā o lea polosiua e fesoasoani atu ai i tagata o ē malamalama i le faa-Peretania ia iloa le upu moni e uiga i le tulaga o le tagata pe a oti, ma i le faamafanafanaina o ē faanoanoa i le faamoemoe o le toetu.
4 Na faaiuina le polokalame i le afiafi o le Aso Toonai i le lauga e faapea: “Lē na Foafoaina Mea—Ona Uiga Totino ma Ona Ala.” Ua taitaiina saʻo atu ai i tatou e faia se faaiuga e faapea, e tatau ona iai Sē na Foafoaina Mea. Ina ia faaaupegaina i tatou e fesoasoani atu i isi ia talisapaia lenei mea moni, na tatalaina ai le tusi faa-Peretania e faapea, Is There a Creator Who Cares About You? A o faamalosia ai lo tatou lava faatuatua ia Ieova ma lo tatou talisapaia o ona uiga totino ma ona ala, ua fuafuaina faapitoa ai lenei tusi mo i latou o ē, e ui ina maualuluga aʻoaʻoga i mataupu masani faaleolaga nei, ae atonu e lē talitonu i le Atua. O tagata faapena e masani ona faitau i le faa-Peretania ma maua ai aogā mai lenei tusi.
5 Se Iugafono Mai le Loto: O le lauga faaiu o le tauaofiaga na faamamafaina ai le manaoga mo i tatou uma lava ina “Ia Savavali Pea i le Ala a Ieova.” Maeu le talafeagai o le faalauiloaina atu i le iugafono e tusa ai ma la tatou filifiliga maumauai taitoatasi ina ia pipii atu pea, ia lagolagosua, ma ia faamaualugaina le silisili o le ala a le Atua i le ola! (Isa. 30:21) Ua tatau nei ona tatou filifili maumauai ia tatou ola e tusa ai ma nei iugafono. Maeu se faaeaga lelei faaleagaga ua tatou maua e ala i le auai i le Tauaofiaga o “Le Ala a le Atua i le Ola”!