Puʻe Avanoa e Molimau ai i Taimi o Aso Malōlō
1 Ua uunaia i tatou e le Tusi Paia: “Pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Kori. 10:31) Ua gafatia e taimi o aso malōlō avanoa e faia ai faapea i le tele o auala.
2 E toatele o le a faia nai malōlōga i le faaiʻuga o le tausaga. Peitai, e lē tatau i so o se tasi o i tatou ona lafoaia la tatou galuega talaʻi ma le aʻoaʻo atu e tusa lava po o le ā le vaitau. O le mea lea, a o i malōlōga, auai i se tauaofiaga, po o taimi o tuuaga a aʻoga, ia naunau e molimau atu i isi. E mafai faapefea ona tatou faia lenei mea?
A O I MALŌLŌGA
3 O e fuafua e asiasi i ou tauaiga i lenei tausaga? O le toatele o i tatou e fiafia e toe faafou sootaga faaleaiga. Afai e lē auai ou tauaiga i le upu moni, atonu e mafai ona tou fetufaai ma i latou i le feau o le Malo. E toatele uso sa taulau manuia ona o le faatalitali ma le onosai seʻi oo i se taimi tatau e molimau ai i o latou tauaiga. I lenei auala, ua aʻoaʻoina ai e o latou tauaiga le upu moni.—Vaai Le Olomatamata, Iuni 15, 1990, itulau 21-23.
4 Afai o e fuafua e malaga ese mai le aiga mo se malōlōga i lenei tausaga, aiseā e lē faia ai ni faatatauga e auai i sauniga ma galulue faatasi ma lena faapotopotoga i le auaunaga i le fanua? Tatou te “alolofa atu i le au uso,” ma o le galulue faatasi ma i latou i le auaunaga i le fanua tatou te maua ai le avanoa e tāea ai aogā mai lo latou tomai i le upu moni a o oo ina iloa lelei i latou. (1 Pete. 2:17) I le auai i sauniga ma tofu sao i le galuega talaʻi a o i malōlōga, e mafai ai ona maua e i tatou lava aogā ma olioli i le faafouina moni faatasi ma o tatou uso.—Mata. 11:28, 29.
PE A AUAI I LE TAUAOFIAGA
5 Pe a auai i le tauaofiaga itumalo, ia molimau atu i isi. O le laeiina o a tatou pine fatafata e ono faaosofia ai le fia iloa o isi ma tatalaina ai le auala tatou te talanoa ai ma i latou e uiga i le upu moni. Vaavaai mo ni avanoa e molimau ai a o savavali atu i le malae o le tauaofiaga, taumamafa i faleʻaiga, pe feoai foi i taavale. E masani ā ona fua mai ni iʻuga lelei i talanoaga lē fuafuaina i na tulaga. O lea ia faatagataga lau Tusi Paia ma ni lomiga talafeagai, ma ia sauniuni e avatu se molimau.
GAOIOIGA FAATELEINA O SE AIGA
6 Ona o le toatele o i tatou o le a tuua aʻoga pe malōlō mai galuega totogi i le faaiʻuga o le tausaga, aiseā e lē faaaluina ai se taimi tele i le faiva i le fanua e ala i le paeonia lagolago? E mafai ona e faaleleia lau faiva i le fanua ma “faateleina” atu lou alofa i le galulue faatasi ma isi. Aiseā e lē galulue ai ma le toatele e mafai ai i le faapotopotoga? (2 Kori. 6:11-13) Ua faaaogāina e nisi aiga atoa lenei taimi e paeonia lagolago faatasi ai. Ua faamalosia e lenei mea lo latou faatuatua ma fusia vavalalata ai i latou ma Ieova ma tagata taitoatasi o se aiga. E faalaeiauina foi le faapotopotoga i lenei mea, ma atonu e iʻu ina faagaeeina ai isi i gaoioiga e sili atu.
7 E masani lava ona faatumulia vaitaimi o aso malōlō i gaoioiga. Ona o le tele naunau o mea e mafai ona faoa lo tatou taimi, e manaomia ai ona manatu i le tausia o se faasologa lelei ina ia mafai ai ona faaaogā tatau lo tatou taimi. I le faataatia muamua o mea faaleagaga i le taimi nei, o le a ‘susulu atu ai lo tatou malamalama i luma o tagata.’ A o latou maimoaina a tatou galuega lelei, atonu o le a uunaia ai nisi e avatu le mamalu ia Ieova, ona o lo tatou puʻe o avanoa uma e fetufaai ai le upu moni ma isi i taimi o aso malōlō.—Mata. 5:16.