O Auala e Faalautele ai Lau Faiva
1 I le sili atu i le 40 tausaga ua mavae, na aliai mai ai i le Watchtower o Ianuari 15, 1955 se mataupu e faapea: “Po o E Faia le Mea Aupito Sili Ona Lelei?” (Is Your Best Good Enough?) Ua faasino mai ai ma le alofa le auala e ono mafai ai e tagata o Ieova ona faaleleia a latou taumafaiga taitoatasi i le faiva ina ia mafai ai ona latou faateleina a latou galuega e faatatau i le Malo. Ua faatatauina foi lena fautuaga lelei i aso nei a o faaauau ona tatou taumafai e faaleleia le mea aupito sili ona lelei tatou te mafaia.
2 O la tatou auaunaga uma e tatau ona uunaia e ala i le poloaiga sili: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.” (Mare. 12:30) Tatou te faaalia lo tatou alofa atoatoa mo Ieova e ala i le faaaogaina atoatoa o avanoa ua tatou maua e faaauiluma ai le galuega o lona Malo. Manatunatu i auala nei e te ono faalautele ai lau faiva.
3 Ia Ave Lau Avega: E mafai e uso tuuina atu ona tauivi ina ia agavaa e avea o ni auauna o le faiva ma agaʻi atu ai e auauna o ni toeaina. O mataupu i lomiga o Le Olomatamata o Aperila 15, 1991 e faapea, “Pe o E Aapa Atu” ma le “Pe ua E Agavaa e Auauna?” ua uunaia ai le toatele o uso e faaavanoa i latou mo tiute tauave i le faapotopotoga. Fesili i toeaina o la outou faapotopotoga mo ni fautuaga patino i le auala e aapa atu ai ma taʻuagavaaina ai.
4 Ua valaauina toeaina ma auauna o le faiva o ē o loo nofofua ina ia mafaufau mamafa e uiga i le faia o se talosaga e ulu atu ai i le Aʻoga mo le Toleniina o Auauna o le Faiva. E mafai ona e faamasani i lenei aʻoga i lou faitauina o faasinoga i lalo o le ulutala “Ministerial Training School” i le Watch Tower Publications Indexes o le 1986-1995, 1996, ma le 1997. Po o e iloa atu lena ‘faitotoa vatele o gaoioiga’ ua avanoa mai i ou luma? (1 Kori. 16:9a) O le toatele o uso o ē na faaaogaina lena avanoa latou te lei mafaufauina nei faaeaga uma o le auaunaga e maua pe a uma le faauuga. I aso nei ua latou fiafia e auauna i Peteli po o le auaunaga i le fanua i le avea o ni paeonia faapito, misionare, po o ovasia matagaluega.
5 Ia Aapa Atu mo le Auaunaga Faataimi Atoa: O talavou ua iu mai aʻoga maualuluga, o tinā tausi aiga, ma so o se isi lava ua aulia tausaga e litaea ai mai galuega totogi, e tatau ona mafaufau mamafa i le avea ma paeonia. Autalu le faaopoopoga o La Tatou Faiva o le Malo o Iulai 1998, ona talanoa atu lea i paeonia o ē na tutusa o latou tulaga ma lou tulaga. Atonu o le a uunaia ai oe ina ia faalautele atu lau faiva e ala i le avea ma paeonia, e pei ona latou faia ai. (1 Kori. 11:1) O le ā e manaomia ina ia mafai ai ona faalautele atu lau galuega i le 70 itula i le masina ma auauna ai o se paeonia sauatoa?
6 E sili atu i le 17,000 uso ma tuafāfine o loo auauna nei i ofisa o lālā ma aiga Peteli i le lalolagi aoao. O loo talanoaina i La Tatou Faiva o le Malo o Mati 1995 le mea e manaomia ona fai e talosaga atu ai mo lena auaunaga. Aisea e lē faitau ai lena faaopoopoga ma vaai po o oe o se tasi e ono agavaa mo le faaeaga tutasi o le auaunaga i Peteli?
7 Ia Auauna i Nofoaga e Manaomia Tele ai le Fesoasoani: Po o e nofo i se oganuu e galueaiina soo po o oganuu o loo toatele ai uso e tausoaina le avega? Po o e mafaufau e faalautele atu lau faiva e ala i le siitia atu i nofoaga o loo manaomia tele ai le fesoasoani? Atonu e mafai ona siitia atu i se vaipanoa e tulata mai o loo manaomia ai se aufaigaluega faaopoopo. (Mata. 9:37, 38) E lē tatau ona faia faatopelau lenei filifiliga. E tatau ona mafaufau i ai faatasi ma le tatalo. (Luka 14:28-30) Talanoa lou tulaga ma toeaina ma le ovasia o le matagaluega. O le a latou fefulisai faatasi ma oe pe faamata e tatau ona fai o lena gaoioiga i le taimi nei po o le sauniuni e faia faapea i se taimi o i luma. Afai e te fia tusi atu i le Sosaiete mo se fautuaga e tusa ai ma le nofoaga e mafai ona e siitia atu i ai, e tatau ona avatu faatasi lau tusi ma se tusi e sainia e le Komiti o le Auaunaga a le Faapotopotoga.
8 Ia Faaleleia Atili Lau Auaunaga: E foliga mai e mafai e i tatou uma lava ona faia se sao atoatoa i le faiva e ala i le faaleleia atili o le uigā o la tatou auaunaga i le fanua. Po o e aafia i vala uma o le galuega, e aofia ai le molimau atu mai lea fale i lea fale ma le molimau lē fuafuaina faapea ma le faia o toe asiga ma suesuega faale-Tusi Paia? Afai o e faia se suesuega, pe mafai ona e faaleleia lou tomai e aʻoaʻo atu? E lelei pe a autalu le faaopoopoga o La Tatou Faiva o le Malo o Iuni 1996 mo ni fautuaga e mafai ona e faaaogā e uunaia ai au tagata suesue agaʻi i le tuuina atu ma papatisoina.
9 O le faalauteleina atili o se talanoaga i auala e faasalafa atu ma faaleleia ai la tatou faiva o loo maua i le mataupu e 9 o le tusi, Organized to Accomplish Our Ministry. Ma le mautinoa lava, e ao ia i tatou uma ona faanaunau ina ia faia le tele tatou te mafaia i le auaunaga a le Atua. Aisea e lē manatunatu mamafa ai i ou sini faaleagaga? Ia fai e pei ona fautuaina mai i le 1 Timoteo 4:15 e faapea: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.”