Pusa Fesili
◼ O le ā le utaga mamao e ao ona iai i mātua pe a auai a latou fanauiti i le auaunaga i le fanua?
E talafeagai i mātua Kerisiano ona ave a latou fanau faatasi ma i latou i le faiva i le fanua, ia toleniina i latou ina ia tufa atu i isi le tala lelei o le malo. I le faia faapea, o loo iai se manaoga ina ia vaavaaia lelei a latou fanau ona o ni lamatiaga e ono tulai mai i le oganuu, e oo lava i vaipanoa e “saogalemu.” Ua faateteleina pea lava pea le avea o tamaiti ma taulaiga o faiga sauā ma le faataumaoia, ona o le tupu tele o le matapeapea ma faiga e sili ona matagā faaleituaiga i nei “aso faigata” o loo tatou ola ai. (2 Timo. 3:1-5) E ao lava i mātua ona iai le faautautaga talafeagai ai auā le puipuia o a latou fanauiti mai tagata e ono maileiina i latou. O le ā e ao ona fai?
Ua fautua mai ma le atamai le Tusi Paia e ao ona ia i tatou se utaga mamao ina ia iloa atu le leaga. (Faata. 22:3; Mata. 10:16) O le faanaunauga iinei e lē ina ia faia ni tulafono, peitai e atamai mo se tasi o mātua po o isi tagata matutua ina ia ō faatasi ma se tamaitiiti pe a auai i le auaunaga i le fanua. Afai e galulue faatasi ni tagata talaʻi laiti se toalua o ē ua mafaia ona faia faapea, e fautuaina se tasi o mātua po o se isi tagata matua ina ia vaavaaia i laua i taimi uma. E moni, a o tuputupu aʻe se tamaitiiti ma faamaonia mai ua mafai ona ia taulimaina nisi mea, e filifili mātua po ua manaomia ona faaitiitia mai le vaavaaiga faamātua i lea tama po o se teine.—Tagai i le Pusa Fesili i La Tatou Faiva o le Malo ia Oketopa 1992.
E atamai foi le manatunatu i le saogalemu a o faimalaga i taavale po o le savavali foi. O le usitaia o lapataiga talafeagai e masani ona taofia ai le tutupu mai o ni faalavelave faafuasei ma avega mamafa o mafatiaga e oo mai, o pili e totogi i falemai, ma tupe e ono totogia faaletulafono ona ua tele tagata ua faia faapea i le lalolagi o loo tatou iai.
E talafeagai mo ē talavou ona “vivii atu i le suafa o Ieova.” (Sala. 148:12, 13) O a latou upu faatamaiti e logolelei i le faalogo ma a latou amioga lelei a o iai i le faiva i le fanua e matuā faagaeetia ai lava isi ma aumaia ai le viiga mo Ieova. Mātua e, ia fai mea uma lava e fesoasoani ai i lau fanau ia auai e lē aunoa i le faalauiloaina o le tala lelei, a o e matuā mataalia foi oe e puipuia i latou mai so o se lamatiaga e tulai mai!