Polokalame Fou mo le Aso Faapitoa o Fonotaga

O le polokalame o le aso faapitoa o fonotaga e amataina ia Setema 1999 ua faamatuaina e faapea: “Suesue i Mea Loloto a le Atua.” (1 Kori. 2:10) O ā mea tāua o le a tatou aʻoaʻoina ai?

I a latou sailiiliga mo le poto, e toatele tagata e lē o faafouina i mea ua latou aʻoaʻoina. Ua faamalosia i tatou e le Tusi Paia, e pei o lea o le a faailoa mai e le ovasia matagaluega i lana vaega ua faamatuaina “O le Saili i le Afioga a le Atua e Maua ai le Faafouina.” O le failauga asiasi o le a na ia faailoa mai le sootaga o le suesue i mea loloto a le Atua ma le talaʻiga o le tala lelei e pei ona ia faailoa mai i le fesili “O le ā Lau Vaaiga i le Talaʻiina o le Malo?”

E mafai faapefea e mātua ona fesoasoani i a latou fanau ina ia sailiili loloto i le Afioga a le Atua? O le a saunia fautuaga aogā i le vaega e faapea “Aʻoaʻo le Afioga a le Atua i Lau Fanau.” Ua taaʻina talavou Kerisiano i se auala lelei e ala i le auaumea faatasi ma ē taʻumatuaina faaleagaga i le faapotopotoga. O faaaoaoga i le auala ua taaʻina lelei ai i latou o le a faamatilatila i le vaega e faapea “O Talavou ua Aʻoaʻoina Mai Ē ua Matutua.”

Aisea e tatau ai i le taimi nei ona tatou saili ma le filigā mo oloa lilo faaleagaga? O Ieova o Lē Faaalia mea lilo. O le a faamatalaina e le failauga asiasi mea na faaalia e Ieova i aso anamua ma aso nei i le lauga “E Faasolosolo Ona Faaalia Mai e Ieova Mea Loloto.” O le a faamalosia e lenei mea la tatou filifiliga ina ia faaauau ona “suesue i mea loloto a le Atua.”

Fuafua nei loa e auai. O i latou o ē o loo mananao e faailogaina lo latou tuuina atu ia Ieova e ala i le papatisoga e ao ona faailoa atu i le ovasia taimua i se vave e mafai ai. O lo tatou faanaunauga moni ina ia auiliiliina le Afioga a le Atua o le a faamalosia ai i tatou i mea ua tatou faalogo i ai. O lea ia aua lava neʻi misia lenei aso faapitoa o aʻoaʻoga faaleagaga!