Mātua—Ia Faataatia se Faaaʻoaʻoga Lelei mo a Outou Fanau
1 Ua taʻu mai e le Afioga a le Atua ia i tatou e faapea, “e matua olioli lava le tamā [ma le tinā] o le ua amiotonu.” (Faata. 23:24, 25) Maʻeu se faamanuiaga mo mātua o ē ua faataatiaina se faaaʻoaʻoga lelei mo a latou fanau! Na faapea mai se sui o le Komiti o se Lālā e uiga i ona mātua: “Sa avea le upu moni ma autū o o la olaga atoa, ma sa ou manaʻo foi e faaautū i ai loʻu olaga atoa.” O le ā e ao ona vaaia e tamaiti i o latou mātua?
2 O Amioga Lelei ma le Faaaloalo Loloto: O le tiute tauave a mātua le totō i loto o a latou fanau uiga lelei ma mamā. O amioga lelei e aʻoaʻoina mai, e lē na o le faatonu i upu, ae ala i mea e mātauina ma faaaʻoaʻoga. O le mea lea, o ā amioga o e faaalia? Po o faalogo lau fanau o e fai atu “tulou,” “faamolemole,” ma “faafetai”? I le aiga, pe faaaloalo loloto le tasi i le isi? Po o e uaʻi atu a o talanoa isi? Po o e faalogologo lelei a o talanoa atu lau fanau ia te oe? Po o e faaalia nei uiga lelei e lē gata i le Maota o le Malo ae faapea foi totonu o le aiga?
3 Ia Malolosi Faaleagaga ma Maelegā i Galuega: E manatua e se uso o lē na ia faaaluina le sili atu i le 50 tausaga i le auaunaga faataimi atoa e faapea: “Sa avea loʻu tamā ma loʻu tinā o ni faaaʻoaʻoga matuā lelei i lo la talisapaia o sauniga ma lo la maelegā i le faiva.” E faapefea ona e faaali atu i lau fanau o loo e manatu mamafa i le tausia o le itu faaleagaga o i latou o i lou auaiga? Po o tou talanoaina faatasi le mau i aso taʻitasi? Po o faia sa outou suʻesuʻega faaleaiga e lē aunoa? Po o vaai lau fanau o e faitauina le Tusi Paia ma lomiga a le Sosaiete? O ā mea o latou faalogo i ai pe a e tatalo e fai ma sui o le aiga? Po o e auai i le faia o ni talanoaga e ati aʻe ai faaleagaga ma lau fanau, i le talanoaina o mea lelei e uiga i le upu moni ma le faapotopotoga? Po o e naunau e auai i sauniga uma ma faia se sao uigā i le faiva i le fanua o se aiga atoa?
4 Mātua e, ia manatunatu i le faaaʻoaʻoga o loo outou faataatia mo a outou fanau. Ia avea o se faaaʻoaʻoga e aupito sili ona lelei, ona avea lea o se mea e sili atu ona pele ia i latou i o latou olaga atoa. Na faapea mai se faletua o se ovasia femalagaaʻi lea ua 70 ma ona tupu nei ona tausaga: “O loo oʻu maua pea aogā mai le faaaʻoaʻoga lelei a oʻu mātua Kerisiano alolofa. Ma o laʻu tatalo faatauanau pea ina ia ou faamaonia atu loʻu talisapaia atoatoa o lenei meaalofa tuufaasolo e ala i le faaaogāina lelei a o faagasolo mai tausaga e oo lava i le lumanaʻi.”