Talosaga Atu mo se Fesoasoani

¹ O upu faagaeeina “aso faigata” ua matuā talafeagai ona faamatalaina ai o tatou aso mataʻutia. (2 Timo. 3:1) I lea, o le ā e mafai ona e faia pe a lua fetaiaʻi ma ni luʻi faigatā faaleagaga atonu e te lagona e leʻi faaauupegaina oe e faafesagaʻia?

² Po o e naunau e te talanoa atu i se tagata ua taʻumatuaina faaleagaga o le faapotopotoga? E ono faalotolotolua nisi e faia faapea ona o le matamuli, e lē manaʻo e faalavelave atu i isi, pe masalosalo foʻi e faapea e leai se tasi e mafai ona fesoasoani moni mai. O le mea moni, e tatau ona tatou tauivi e tauave a tatou lava tiute tauave tōtino i le mea sili tatou te mafaia, ae e ao lava foʻi ona ia i tatou le lagona saʻoloto e sāʻili se fesoasoani i matāʻupu e aafia ai lo tatou tulaga lelei faaleagaga.—Kala. 6:2, 5.

³ Nofoaga e Amata ai: Atonu e te manaʻo e faalatalata atu i la outou faisuʻesuʻega o le suʻesuʻega tautusi ma talosaga i ai pe mafai ona lua galulue i le auaunaga i le fanua. O lenei mea o le a e maua ai le avanoa e faailoa atu ai ia te ia e uiga i lou faanaunauga e fia tuputupu aʻe faaleagaga. Afai o ia o se auauna o le faiva, ia faailoa atu i ai lou manaʻoga mo se fesoasoani faaleagaga ma o le a ia talosaga atu loa i toeaina ina ia fesoasoani atu ia te oe. E mafai foʻi ona e faalatalata atu i so o se tasi o le ʻautoeaina e uiga i matāʻupu o loo e popole ai.

⁴ O le ā le ituʻāiga o fesoasoani e te manaʻomia? Po o iai se mea ua faavaivaia ai lou māʻelegā? Po o oe o se matua nofo toʻatasi o loo taumafai e tausia lau fanau ia auaufaatasi mai i le faapotopotoga? Po o oe o sē ua āfu lou soifua o loo manaʻomia se fesoasoani? Po o iai se faafitauli o loo faalotovaivaia ai oe? Atonu e lē faigofie ona tatou faafesagaʻia o tatou aso faigatā—ae e lē faapea e lē mafaia. O loo maua le fesoasoani.

⁵ Auala e Fesoasoani ai Tane Matutua: E manatu moni mai lava toeaina. O le a latou faalogologo atu i ou popolega. Pe afai e fetaiaʻi isi tagata talaʻi ma ni toʻatugā faapena, o le a nofouta i ai le ʻautoeaina a o latou leoleoina ma aʻoaʻo atu i le faapotopotoga. I le avea o ni “faaaʻoaʻo i le lafu mamoe,” e latou te nofo sauni e galulue soosoo tauʻau ma oe ma le ʻoliʻoli. (1 Pete. 5:3) O le faalogologo atu i nei uso ua lava le poto masani a o latou talanoa mai i matāʻupu silisili o le Tusi Paia, e mafai ona faaleleia ai lau faiva ma fesoasoani ia te oe i lou olaga tōtino.—2 Timo. 3:16, 17.

⁶ Ua foaʻi mai e Iesu ia i tatou le tele o “meaalofa o loo faia aʻe i tagata.” (Efe. 4:8, faamatalaga pito i lalo NW) O le uiga o lenei mea o loo nofo sauni le ʻautoeaina e tautua mo oe. O loo avanoa i latou e fesoasoani atu ia te oe. O lona uiga la, o i latou, “o a outou ia.” (1 Kori. 3:21-23) O lea na i lo o le faatalatū, ia talanoa atu i ai. Talosaga i ai mo se fesoasoani o e manaʻomia.