Po o Tatou Mataala Pea—E ʻAlofia Faatōsinaga?
1 Na lapataʻi mai Iesu e faapea: “Ia outou mataala . . . ina ia outou maua le malosi e sao” ai mai mala ua toeitiiti ona oo mai lea. (Luka 21:36, LF) Ua tatou ola nei i le taimi aupito sili ona mataʻutia i le talafaasolopito o le tagata. O loo faatali mai mala mo i latou o loo tautulemomoe faaleagaga. O lenei mea ua aumaia ai se tulaga lamatia mo i tatou taʻitoʻatasi.
2 Faatōsinaga Masani: O nisi ua faaalu uma o latou taimi i faafiafiaga soonafai po o faafiafiaga e lē talafeagai, ua oo lava ina fai ma masani le pulea e TV. O le mea moni, o le muaʻi sāʻilia o le Malo o le a lē uiga ai e faapea e tatau ona tatou ʻalofia faafiafiaga uma. Ae e avea o se faatōsinaga pe afai o le a matuā faatāuaina i o tatou olaga, ma matuā faaalu uma ai lo tatou taimi, a tatou alāʻoa, po o lo tatou sao i le galuega talaʻi o le Malo.
3 O le isi faatōsinaga masani e faapogai ai ona tulemomoe faaleagaga, o le tuʻinanau i mea faitino e lē manaʻomia. O lenei mea e manaʻomia ai ona faigaluega se tasi mo ni taimi uumi i galuega totogi ma faapogai ai ona tūlei i tua mea faaleagaga. O le lē taulau ona taulaʻi atu o tatou mafaufau i matāʻupu tau i le Malo, e ono oo ina tatou faatamala ai i le tausia lelei o manaʻoga faaleagaga o o tatou ʻāiga, ma lē taulau ai ona faaiʻuina la tatou faiva.—1 Timo. 5:8; 2 Timo. 4:5.
4 O loo iai pea foʻi nisi ua ‘mafatia o latou loto i le soona popole i mea a le olaga nei,’ ua oo ai ina latou momoe faaleagaga. (Luka 21:34, LF) I nisi taimi, e oo ai le popole ona o faafitauli o le soifua mālōlōina po o tulaga mafatia i totonu o le ʻāiga. Ae e lē tatau ona faatagaina na popolega tōtino e faaitiitia ai lo tatou mataala faatatau i le matuā vave tele mai o le iʻuga o lenei faiga o mea.—Mare. 13:33.
5 Mea e Fesoasoani ia i Tatou ia Tūmau Ona Mataala: O ā na mea? E matuā tāua le tatalo. E tatau ona tatou tatalo e lē aunoa. (1 Tesa. 5:17) O le pipii vāvālalata i le faapotopotoga Kerisiano o le a ‘faatupu ai lo tatou alofa ma galuega lelei.’ (Epe. 10:24) O le suʻesuʻe pea ma le faamaoni ia i tatou lava, e mafai ona fesoasoani e faatumauina lo tatou mataalia i le manaʻomia ona tatou manumalo i o tatou vāivaiga. (2 Kori. 13:5) O le avea o se masaniga lelei i le faia o suʻesuʻega tōtino o le a tūmau pea ona “tausia ai [i tatou] i upu o le faatuatua.” (1 Timo. 4:6) Pe afai tatou te filigā, o le a tatou mautinoa ai e mafai ona tatou ʻalofia faatōsinaga, ‘ia mataala ma tumau i le faatuatua.’—1 Kori. 16:13