O se Faaeaga ua Avanoa mo Ē Talavou
1 E manatua ma le fiafia e le toʻatele o ē ua avea nei ma mātua se faaeaga na latou olioli ai a o avea ma fanau na tutupu aʻe i le upu moni—galuega o le Aso Mekasini. Na faavaeina lena galuega i faapotopotoga uma lava i le 1949. E tasi le aso o le vaiaso sa uaʻi totoʻa atu ai tagata uma lava i le tufaina atu o mekasini o Le Olomatamata ma le Ala Mai! i ala tetele, i lea fale i lea fale, i lea faleoloa i lea faleoloa, ma i isi auala. Sa āloālo faapitoa atu lava le ʻautalaʻi talavou i le faia o se sao i lenei galuega ona sa latou maua ai le avanoa e faia ai se sao i lenei lava galuega e pei foʻi o tagata matutua i le faapotopotoga. Pe sa e faapena a o e laʻitiiti?
2 Faaaofia Lau Fanau: O fanau e laiti tele o ē e leʻi nofosauni e amataina se talanoaga faale-Tusi Paia i le fale, e mafai lava ona latou ofoina mekasini. E manaʻomia ai i lenei mea le aʻoaʻoina na o se taulimaga faigofie o ni nai fuaiupu pupuu. E lava ma totoe na o ni faaupuga puupuu atonu e uiga i le ata o loo i le faavaa. E toʻatele tagata e ona fale latou te naunau e talia fiafia lomiga mai o tatou talavou laiti, e masani ona latou taʻuleleia le faamaoni ma amioga lelei a nei talavou. E na o sina fesoasoani itiiti lava, ona mafai ai lea e fanau ona faia lelei lenei auaunaga, e faia ai se sao tāua i le faasalalauina atu o le feau o le Malo. O le mea moni, a o tutupu aʻe ina matutua tamaiti, o le a mananaʻo o latou mātua e fesoasoani ia i latou e faaauau pea ona agaʻigaʻi i luma i le atiina aʻe o lo latou tomai e molimau atu ai.
3 Na amata ona talaʻi Manuele i lea fale i lea fale ina ua tolu ona tausaga. Na aʻoaʻo o ia e ona mātua ina ia taulotoina se taulimaga puupuu. E talaʻi ma le maelega o ia faatasi ma i laʻua, i le tufaina atu o le tele o mekasini, polosiua, ma sāvali. E molimau lē fuafuaina atu foʻi. I se tasi aso ina ua ave o ia e ona mātua i se paka e faatafao ai, sa ia tausolomua ona tufaina atu ni sāvali i isi tagata o ē na iai iinā. E ui e matuā laʻitiiti lava o ia, ae ua avea le maelega o Manuele i le faiva ma puna o faalaeiauga moni i ona mātua faapea le faapotopotoga atoa.—Faata. 22:6.
4 Ua faatulagaina i le 2000 Calendar of Jehovah’s Witnesses, Aso Toonai uma lava o le “Aso Mekasini.” Mātua e, ua matou fautua atu ina ia toe faafouina le naunau i lenei galuega, ia fesoasoani i lau fanau ina ia faia e lē aunoa se sao i le mea e mafaia i lenei faaeaga o le auaunaga.