Taulimaina o le Tala Lelei—I le Faaaogāina ma le Uigā o Savali
1 I le Tauaofiaga Itumalo “Faatuatua ia Ieova” 1987, na tatalaina ai savali fou e fa. O loo lomia nei foi i latou i le faa-Samaoa ma e lē o toe mamao ona maua mai lea. Ua faaulutalaina i latou Le Pogai e Mafai ai Ona E Faatuatua i le Tusi Paia, O Ā Mea e Talitonu i ai Molimau a Ieova?, Olaga i se Lalolagi Fou Filemu, ma le O le ā le Faamoemoe mo Ē ua Maliliu? Po ua e faaaogāina ma le uigā nei savali i le fanua?
2 E tuua e le toatele o le au talaʻi savali i faitotoa e leai se isi i le fale. Ma latou te tufaina i latou i tagata o ē pisi tele e faalogo i le taimi e asiasi atu ai. Ua iloa e nisi afai latou te faaaogā se savali e faailoa ai i latou i le faitotoa, e fesoasoani lea e faagaeeina le naunau o lē ona le fale. E sili i nisi le ofoina faameaalofa o i latou i asiga e leʻi tuua ai se lomiga ae na faaalia ai se naunau.
FAAAOGA I LATOU AFEA MA FAAPEFEA
3 E ala i le fetuutuunai ma le mataʻalia i avanoa, atonu e te mauaina ai taimi e ofo ai savali. E pei o lea, e mafai ona fesoasoani savali pe a molimau i tauaiga. E mafai ona e faaaogā savali a o ē i malologa, a o faatau pe malaga, i le aʻoga, po o i lou fale faigaluega. Pe e te tuua savali i se mea e faigofie ona tapā, atonu pe i lou peleue po o le taga o lou ofutino, atotupe, po o le atopaʻu? O le ia te oe o savali i taimi uma atonu e faamalosia ai oe e molimau lē fuafuaina. Aiseā e le tagai ai mo avanoa e ofo ai savali?
4 Tusa lava pe leai ni avanoa, e mafai ona e faaaogā savali e avatu ai se molimau sili ona uigā. E ui ina puupuu le feau o loo iai, ae o a latou faamatalaga e faagauloto ma ua lagolagoina ma le manino e manatu faale-Tusi Paia. Ua matagofie ona mamanuina ata o savali ma e mafai ona avea o se meafaigaluega aogā i le faataunuuina o mea lelei e tele i le faiva. Ia mataʻalia e ofo i latou i tagata i so o se mea.
I LE AUAUNAGA I LE FANUA
5 Pe ua e faaaogā tatauina ulutala faatupu manatu o savali e atiina aʻe ai le naunau i le feau o le Malo a o galue mai i lea fale ma lea fale? E faamatilatila e nisi tagata talaʻi le ulutala o se savali i le taimi lava e fai ai a latou faatomuaga. Aiseā e te lē tofoina ai e oe lava lena upuoʻo? E te ono faapea: “Talofa. Ua ou fiafia e maua mai oe i le aiga. O loo oʻu tauofo e auai i le tufatufaina o se feau e sili ona tāua. O loo maua lea i lenei savali Olaga i se Lalolagi Fou Filemu. O lau kopi lea. E ave fua. [Tuu i lē ona le fale, ma faatosina manatu i le faavaa.] Pe e te lē manao e ola i sea siomaga filemu?” Afai ai e faataga e aiaiga, faaauau i le Mataupu mo Talanoaga, ma faafesootai i le ofo mo le masina.
6 E faalagolago i le mea o ē nofo ai, atonu o le a ē iloa e aogā ona taʻutino faapea o lau feau e mai le Tusi Paia. O le savali Le Pogai e Mafai ai ona E Faatuatua i le Tusi Paia atonu o le a uigā tele i lou vaipanoa. E pei o lea, e te ono fai atu: “O loo matou tuua se feau faale-Tusi Paia e leai se totogi ma o matou tuaoi i le asō. O le kopi lea ma oe. [Tuu i lē ona le fale.] Mātau o lena e faatatau le mataupu i le Tusi Paia. Pe e te manatu ua leiloa le faatuatua o tagata i le Tusi Paia i aso nei. [Faataga mo se tali.] O le a fesoasoani lenei savali ia te oe e iloa pe aiseā e mafai ai ona tatou talitonu i le mea ua fai mai ai le Tusi Paia.” Faaauau i le Mataupu mo Talanoaga, faaalia faamanuiaga ua teuina e le Atua mo le lalolagi.
7 O le tufatufaina o savali o se luʻi tau ma sa auala uigā o le taulimaina o le “tala lelei.” (Mata. 24:14) Ua latou faatinoina se vaega tāua i la tatou faiva i le lautele ma pe a tatou molimau lē fuafuaina. Seʻi o tatou faaaogā ma le uigā a tatou savali matagofie e avatu ai se molimau lelei ma fesoasoani ai i isi e aʻoaʻo faatatau i le Malo o le Atua.