Mauaina o le Olioli i Lau Auaunaga Paia
1 Na latou toe foʻi atu “ma le olioli.” Ua faaalia i le faamatalaga a le Tusi Paia le lagona na oo i soo e toʻa 70 ina ua toe foʻi atu ia Iesu, ina ua mavae se talaʻiga tele faataamilo. Sa oo ia i latou se loto matuā fiafia ona o le faia o le finagalo o le Atua. (Luka 10:17) O le ā e mafai ona fesoasoani ia te oe ina ia maua ai lena olioli i le auaunaga paia?
2 Se Uiga Mautinoa: Ua tuuina atu ia te oe le faaeaga mai le Atua o le faailoa atu lea i tagata o le fuafuaga sili a Ieova. E ala i lau talaʻiga, e mafai ai ona e fesoasoani e faasaʻolotoina se tasi mai faiga matagā a lenei lalolagi ma saisaitiaga a lotu sesē. E mafai ona e ofoina atu i tagata le faamoemoe o le ola i se lalolagi e saʻoloto mai le fevaevaeaʻi o loo siʻomia ai i tatou i aso nei. Seʻi manatu i le olioli na oo ia Ieova ina ua e taulau manuia i le totōina o fatu o le upu moni i se lototalileleia. Ia faamautinoa i lou tatalo atu mo le agaga o Ieova ina ia faatupu i lou loto le fua o le olioli a o faaauau pea ona e faia le faiva ma lou loto atoa.
3 Toleniga Aogā: O le faasologa o faatonuga na faia e Iesu faatasi ma soo e toʻa 70 ua faatusaina i se Sauniga o le Auaunaga i aso nei. Sa ia saunia le toleniga ina ia mafai ai ona latou faataunuuina ma le uigā la latou faiva. (Luka 10:1-16) I aso nei o le Sauniga o le Auaunaga e toleni ai oe i auala e te faafeiloaʻia ai tagata, le auala e amataina ai ni talanoaga, ma le auala e amata ma faia ai ni suʻesuʻega faale-Tusi Paia i aiga. O lou faatatauina e oe lava ma faaleleia ou tomai e talaʻi ai, o le a e iloa ai ua faaitiitia ni faalogona lē mautonu ma le lē agavaa atonu o loo iai pea ia te oe, ma suia ai i le mautinoa ma le olioli.
4 Tepa Taulaʻi i le Lumanaʻi: Na maua e Iesu le olioli i lana auaunaga paia e ui i mafatiaga na ia onosaia. Aiseā? Auā sa tepa taulaʻi atu o ia i faamanuiaga ma faaeaga na taatitia mai i ona luma. (Epe. 12:2) E mafai foʻi ona e faia le mea lava lea e tasi e ala i le taulaʻi atu pea o lou mafaufau ma lou loto i le suafa o Ieova faapea ma faamanuiaga o loo fotuaʻi mai i le lalolagi fou a le Atua. O lenei mea o le a faaopoopo atu ai le olioli ma le uigā i lau faiva.
5 O le tuuina atu o le auaunaga paia ia Ieova o se faaeaga aupito sili lea ua mafai ona e maua i aso nei. O le mea lea, seʻi e faapea atu: “Loʻu Atua e, ou te fiafia e fai lou finagalo.”—Sala. 40:8.