Pusa Fesili

◼ E mafai faapefea ona fesoasoani le ʻautautua i mātua ina ia fesoasoani i a latou fanau ia tausisia amioga tatau i sauniga?

O tamaiti e masani lava ona tafitifiti solo, e lē masani i le nonofo mo se taimi umi. I le taimi e uma ai le sauniga, e ono faaosofia ai le tiotio o tamaiti ma uunaia ai i latou e fetamoʻeaʻi solo ma tuli isi tamaiti i totonu o le Maota o le Malo po o isi nofoaga e fai ai sauniga, i mea e paka ai taavale, po o autafa o le auala. Ae, e moni le faataoto e faapea: ‘O le tama ua tuulafoaʻiina, e tupu ai le ma o ona matua.’—Faata. 29:15.

O le mea e faanoanoa ai, ona o nisi o o tatou uso ma tuafāfine matutua, ua oo i ai ni manuʻa tugā ona o le taufetuli atu o tamaiti ma fetoʻai ma i latou ma paʻūʻū ai i lalo. O lenei mea ua faapogaia ai ni mafatiaga faapea ma tupe faaalu sa lē tatau ai a mātua ma le faapotopotoga. Mo lo latou lava saogalemu faapea le saogalemu o isi, e lē tatau ona faatagaina tamaiti e fetaufetuliaʻi ma taaalo i totonu po o fafo atu o le Maota o le Malo.

Ua iai i mātua le tiute tauave faale-Tusi Paia e toleni a latou fanau ina ia faaalia le faaaloalo tatau i o tatou nofoaga o tapuaʻiga. (Fai. 5:1a) I a tatou sauniga faa-Kerisiano, fonotaga, ma tauaofiaga, ua tofia le ʻautautua e vaai po ua “faia mea uma lava ma le matagofie” ma o loo “sauni lelei.” (1 Kori. 14:40; Kolo. 2:5) E tatau ona latou mataalia i taimi uma i totonu ma fafo a o leʻi amataina, a o faagasolo, ma pe a uma le polokalame. Afai e fetamoʻeaʻi le tamaitiiti pe oo ina lē pulea, e mafai e le tautua ona taofi lemū le tamaitiiti, ma e mafai ona ia faamatala atu i ai le mafuaaga e lē talia ai na gaoioiga. E tatau foʻi ona faailoa atu ma le agalelei i mātua o le tamaitiiti e uiga i le faafitauli ma le manaʻoga ina ia vaavaai lelei le tamaitiiti. E tatau i le matua ona talilelei atu.

Ua iloa lelei foʻi e faapea, i nisi taimi o pepe ma tamaiti laiti e ono fetagisi pe oo ina avea ma faalavelave i le taimi o sauniga. Pe a taunuu atu le ʻautautua, a itiiti mai pe a toe 20 minute amata le polokalame, e mafai ona taofia ni laina nofoa pito i tua se lua mo mātua o ē e mananaʻo e nonofo ai iinā ma a latou fanau laiti. O isi uma o i tatou e tatau ona felagolagomaʻi e ala i le faaavanoa o na nofoa mo i latou.

Pe afai e faalavelave se tamaitiiti i le taimi o sauniga, e tatau loa ona gaoioi le matua. Afai e lē faia e le matua se gaoioiga ma ua faateteleina le faasoesa, e tatau i se tautua ona talosaga atu ma le agalelei i le matua pe mafai ona ave i fafo le tamaitiiti. Afai tatou te valaaulia i sauniga ni tagata fou e iai ni fanau laiti, e ao ona tatou nonofo faatasi ma i latou ma fesoasoani atu i ai pe a fetagisi tamaiti pe faalavelave foʻi i isi auala.

E tatou te olioli i le vaai atu i tamaiti o tupulaga eseese i le Maota o le Malo ma mātauina a latou amio lelei i totonu o le aiga o le Atua. (1 Timo. 3:15) O lo latou faaaloalo i le faatulagaga a Ieova mo le tapuaʻiga, ua faamamaluina ai o ia ma e talisapaia e tagata uma i le faapotopotoga.