Pusa Fesili
◼ O ai e tatau ona ofoina atu tatalo i sauniga a le faapotopotoga?
O tatalo a le faapotopotoga, o se vaega tāua o la tatou tapuaʻiga. O le fai ma sui o isi i luma o Ieova, o se faaeaga tautele ma o se tiute tauave tāua. Ona o le manatu i le tāua o le tatalo, e tatau ai i le ʻautoeaina ona faaaogā le faautauta lelei pe a filifilia po o ai uso ua agavaa e ofoina atu tatalo i sauniga. O uso papatisoina o loo fai ma sui o le faapotopotoga e ao ona avea o ni faifeʻau Kerisiano taʻumatuaina o ē ua mātauina i le avea o ni faaaʻoaʻoga lelei ma e faaaloalogia e le faapotopotoga. O a latou tatalo migao ma le faaaloalo, e ao ona atagia atu ai se faiā lelei ma Ieova le Atua. I le mataupu “Tatalo i Luma o Isi Ma le Loto Maulalo” i le lomiga o Le Olomatamata o Ianuari 1, 1987, o loo otooto mai ai mataupu silisili tāua e aogā faapitoa lava mo i latou o ē tatalo i luma o le lautele e fai ma sui o le faapotopotoga.
O le a lē faaaogāina e le ʻautoeaina se uso e faia se tatalo pe afai o loo mātauina o ia i le faia o amioga faalētalafeagai po o le faaulaula. O le a lē faaaogāina se uso o lē e mātele ina faagaulēmalie pe e faanaunau e faaaogā le tatalo i luma o le lautele e fai ma auala e faalauiloa atu ai ni feeseeseaʻiga totino. (1 Timo. 2:8) E tusa lava pe atonu ua papatisoina se uso talavou, e tatau i toeaina ona fuafua lelei po ua matua faaleagaga o ia e tatalo e fai ma sui o le faapotopotoga.—Galu. 16:1, 2.
I nisi taimi i faatasiga mo le auaunaga i le fanua, e ono tatau mo se tuafafine ua papatisoina ona ofo atu le tatalo pe afai e leai se uso agavaa e fai ma sui o le vaega. E manaʻomia i le tuafafine ona fai sona ufiulu talafeagai. Afai e foliga mai o le a lē auai se uso agavaa i nisi o faatasiga mo le auaunaga, e ao i toeaina ona tofia se tuafafine agavaa e taʻimua.
O le tu masani lava a le taʻitaʻifono o le Sauniga mo le Lautele o ia e ofoina atu le tatalo amata. Ae peitaʻi, i isi sauniga a le faapotopotoga, pe afai e toʻatele atu ni uso agavaa e iai, e mafai la ona valaaulia se isi uso e ese ai mai le uso o loo amataina le sauniga po o lē ua tofia i ai le vaega mulimuli e na te ofoina atu le tatalo amata po o le tatalo faaiʻu. I so o se mea lava e fai, o le uso lea o le a valaaulia e faia le tatalo i se sauniga a le faapotopotoga, e tatau ona muaʻi faailoa atu i ai ina ia mafaufau ai o ia i mea o le a ia fai atu ai. Ona mafai ai lea ona ia ofoina atu se tatalo uigā ma le faamaoni e talafeagai mo lena sauniga patino.
O na tatalo e lē manaʻomia ona uumi. Pe a ofoina atu e se uso se tatalo mo le lautele, o le a sili atu ona faigofie ona malamalama ia te ia pe a ia tū i luga, ma fai atu i se leotele e mafai ona lagona uma mai ma ia faamanino le faaleoina o ana upu. O le a mafai ai i lenei mea ona lagonaina mai e tagata uma o loo aofia ai le tatalo ma mafai ai ona faapea mai ma le lotoatoa i le faaiʻuga, “Amene.”—1 No. 16:36; 1 Kori. 14:16.