“Ou te Mafaia Faapefea, pe a Le Faasino Mai se Tasi ia te Au?”

¹ Ina ua fesili atu le faievagelia o Filipo i le eunuka Aitiope po o ia malamalama i mea na ia faitauina mai le Afioga a le Atua, na tali atu le tamāloa: “Ou te mafaia faapefea, pe a le faasino mai se tasi ia te au?” Sa fesoasoani atu ma le fiafia Filipo ia te ia ina ia malamalama i le tala lelei e uiga ia Iesu, na iʻu ai ina papatisoina loa le tamāloa. (Galu. 8:26-38) Sa usiusitai Filipo i le tofiga mai ia Keriso ina ia ‘fai nuu uma lava ma soo, ma papatiso atu ia te i latou ma aʻoaʻo ia te i latou.’—Mata. 28:19, 20.

² E tatau ona tatou usiusitai i le tofiga ina ia faia soo, e pei ona sa faia e Filipo. Ae peitaʻi, o le ituaiga o agaʻigaʻi vave i luma faaleagaga e pei o lea na faia e le eunuka Aitiope, e lē o masani ona vaaia i tagata ia tatou te suʻesuʻeina le Tusi Paia. O lena tamāloa, o se tagata liulotu i le tapuaʻiga Iutaia e poto tele i le Tusi Paia, sa iai se loto talileleia ma na pau lava le mea sa manaʻomia mo ia o le talia lea e faapea o Iesu o le Mesia folafolaina. Ua avea o se luʻi pe afai e lē masani i latou o tatou suʻesuʻe ma le Tusi Paia, ua faasesēina i aʻoaʻoga sesē faalotu, po o mafatia foʻi i o latou lava faafitauli faigatā. O le ā o le a fesoasoani ia i tatou ina ia taulau manuia ai i le taʻitaʻiina o tagata suʻesuʻe o le Tusi Paia i le tuuina atu ma le papatisoga?

³ Ia Iloa Manaʻoga Faaleagaga o le Tagata Suʻesuʻe o le Tusi Paia: I le faaopoopoga o La Tatou Faiva o le Malo o Aokuso 1998, o loo talanoaina ai le umi o le taimi e tatou te ono suʻesuʻe ai ma tagata, e faaaogā ai le polosiua o le Manaomia ma le tusi o le Poto. Na aumaia ai le faatonuga lenei: “E manaomia ona fetuunai le alualu o le suesuega ia ogatusa ma tulaga ma le tomai o le tagata suesue. . . . Tatou te lē mananao ia faatatope le tusi ae lē o maua lelei e le tagata suesue le malamalamaga manino o le poto saʻo. O tagata suesue uma lava e manaomia se faavae mausalī mo lona faatuatua fou ua maua i le Afioga a le Atua.” O lea, e lelei ai ona aua le faatopetopeina ona faia o mataupu i le tusi o le Poto ona o le manatu ina ia taumafai e faauma le tusi i totonu o le ono masina. Atonu e manaʻomia se taimi e sili atu i le ono masina e fesoasoani ai i nisi tagata ina ia agaʻigaʻi i luma mo le papatisoga. A o e faia le suʻesuʻega i lea vaiaso ma lea vaiaso, ia faaalu po o le ā lava se taimi e manaʻomia e fesoasoani ai i le tagata suʻesuʻe ina ia malamalama ma talia mea o ia aʻoaʻoina mai le Afioga a le Atua. I nisi o tulaga, atonu e manaʻomia ona faaalu le lua pe tolu vaiaso e talanoaina ai se mataupu se tasi i le tusi o le Poto. O lea faiga o le a lava ai le taimi e faitau ma faamanino ai le tele o mau na o loo taʻua ai.—Roma 12:2.

⁴ Ae peitaʻi, e faapefea pe afai ua uma le tusi o le Poto ae ua e vaai atu e manaʻomia ona faaloloto le poto o le tagata suʻesuʻe i le upu moni, pe e leʻi uunaʻia atoatoa o ia e tū mo le upu moni ma tuuina atu lona ola i le Atua? (1 Kori. 14:20) O ā nisi o mea e mafai ona e faia atili ina ia taʻitaʻi ai o ia i le ala o le ola?—Mata. 7:14.

⁵ Faamalie Manaʻoga Faaleagaga o le Tagata Suʻesuʻe: Afai e iloatino le agaʻigaʻi i luma o le tagata suʻesuʻe, e ui ina faagesegese, ma ua agaʻi ina ia talisapaia mea o ia aʻoaʻoina, ona faaauau pea lea o le suʻesuʻega faale-Tusi Paia i se isi tusi pe a uma le polosiua o le Manaomia ma le tusi o le Poto. Atonu e lē manaʻomia lenei faiga i tagata uma, ae afai e manaʻomia, ona faaauau lea o le suʻesuʻega i le tusi o le Autasia i le Tapuaiga. O le toʻatele o tagata talaʻi ua iai a latou kopi o lenei tusi e mafai ona faaaogā pe afai ua leai ni tusi a le faapotopotoga. O le tusi lenei e lē o toe maua i le lālā a Ausetalia. I tulaga uma, e muamua lava ona suʻesuʻeina le polosiua o le Manaomia ma le tusi o le Poto. O le taimi o le suʻesuʻega faale-Tusi Paia, le faia o toe asiga, ma le taimi e faaalu i le faaauauina o le suʻesuʻega e tatau ona faitau uma i le lipoti e tusa lava po ua uma ona papatisoina le tagata suʻesuʻe a o leʻi uma le tusi.

⁶ Po o le uiga o lenei mea e faapea, o i latou ia ua faatoʻā uma ona papatiso ae e na o le tasi le lomiga na suʻesuʻeina e tatau nei ona tuuina atu i ai se isi fesoasoani e suʻesuʻe ai se tusi lona lua? E lē manaʻomia i tulaga uma. Ae peitaʻi, atonu ua oo ina lē toe talaʻi i latou pe atonu foʻi e lē o agaʻigaʻi i luma i le upu moni, ma atonu ua latou lagona e latou te manaʻomia se fesoasoani totino ina ia faatatauina le upu moni i se tulaga e sili atu i o latou olaga. E tatau ona faafesootaʻi atu le ovasia o le auaunaga a o leʻi toe amataina se suʻesuʻega ma se tagata talaʻi ua uma ona papatisoina. Ae peitaʻi, afai o e iloa nisi na suʻesuʻeina le tusi o le Poto i taimi ua mavae ae lē o agaʻigaʻi i luma e faia se tuuina atu ma papatisoina, atonu e tatau ona e alu muamua e vaai pe e latou te mananaʻo e toe faia ni a latou suʻesuʻega faale-Tusi Paia.

⁷ O se faailoga o le alofa faa-Kerisiano le uaʻi totoʻa totino atu i tagata lotofiafia taʻitoʻatasi o ē o tatou suʻesuʻe. O lo tatou sini o le fesoasoani atu lea i tagata suʻesuʻe ina ia maua le malamalamaga sili i upu moni o le Afioga a le Atua. Ona mafai ai lea ona ia faia se tulaga maʻoti ma le malamalama mo le upu moni ma tuuina atu lona ola ia Ieova, i le faailogaina o lena tuuina atu e ala i le papatisoina i le vai.—Sala. 40:8; Efe. 3:17-19.

⁸ E te manatua le mea na tupu ina ua uma ona papatisoina le eunuka Aitiope? “Ua alu foi ia i lana malaga ma le olioli” i le avea o se soo fou o Iesu Keriso. (Galu. 8:39, 40) Tau ina ia mafai e i tatou ma i latou na tatou taʻitaʻi mai ma le taulau manuia i le ala o le upu moni ona maua le olioli sili e auauna atu ia Ieova le Atua—i le taimi nei ma e oo lava i le faavavau!