Polokalame Fou o le Fonotaga Matagaluega

Ua tatou iloa ua tatau ma onomea lo tatou alofa ma lo tatou tuutoina atoatoa ia Ieova le Atua. Ae peitaʻi, o loo saʻili le lalolagi e faatosina ese i tatou mai le tausisia o la tatou faiā vavalalata ma ia. (Ioa. 17:14) Ina ia faamalosia lo tatou alofa mo Ieova ma faamalosia i tatou e tetee atu i mea a le lalolagi o loo lamatia ai lo tatou tulaga faaleagaga, o le polokalame fou o le fonotaga matagaluega mo le tausaga faaleauaunaga e 2001, o le a faia e tusa ai ma lona matua “Ia Alofa i le Atua—Ae Lē o Mea a le Lalolagi.”—1 Ioa. 2:15-17.

O le alofa loloto mo Ieova ua uunaʻia ai i tatou e avatu se molimau e uiga ia te ia. Ae ui i lea, e lē faigofie le auaunaga i le fanua mo le toʻatele o tagata o le Atua. I le vaega “O le Alofa i le Atua ua Uunaʻia ai i Tatou i la Tatou Faiva,” e iloa ai le auala ua manumalo ai le toʻatele mai le matamuli ma isi toʻatugā ina ia faia se sao atoatoa i lenei galuega.

Ua faapefea i tulaga o loo faaauau pea ona sili atu ona leaga o le lalolagi ona taaʻina ai i tatou? O gaoioiga sa manatu i ai e leaga ua taʻua i le taimi nei o amioga masani. O le lauga “O Ē Alolofa ia Ieova e ʻInoʻino i le Leaga” ma le lauga faasolo “Mea a le Lalolagi—E Faapefea Ona Tatou Vaai i Ai?” o le a faamausalīina ai la tatou filifiliga e tetee atu i tuʻinanauga sesē o le lalolagi.

O le a aofia ai i le polokalame se faataʻitaʻiga o le Aʻoga o le Faiva Faatiokarate ma le Sauniga o le Auaunaga, faapea ma le aotelega o le mataupu mo le Suʻesuʻega o Le Olomatamata i le vaiaso. O le lauga lautele e faapea, “Le Auala ua Manumalo ai le Alofa ma le Faatuatua i le Lalolagi,” o le a faalaeiauina ai i tatou ina ia faataʻitaʻi ia Iesu i le tetee atu i omiga mai le lalolagi. (Ioa. 16:33) Ia mautinoa ua valaaulia au tagata suʻesuʻe o le Tusi Paia ina ia auai. O nisi e mananaʻo ina ia papatisoina e ao ona faailoa vave atu i le ovasia taʻimua ina ia mafai ai ona faia fuafuaga tatau.

O le fonotaga matagaluega lenei o le a taulaʻi atu ai o tatou manatu i le mea moni lava e tatau ona faaautū i ai lo tatou alofa, ina ia olioli ai i le tamaoaiga o faamanuiaga a Ieova. Aua lava neʻi misia se mea e tasi o na mea!