Polokalame Fou o le Fonotaga Matagaluega
O se tasi uiga o le mataʻu, o le “matuā migao ma le gatete, aemaise lava agaʻi i le Atua.” Ua faamatalaina e lenei mea le mataʻu mamā o loo faasino i ai le Tusi Paia e faapea “o le amataga lea o le poto.” (Sala. 111:10) I le isi itu, e iai se isi ituaiga o mataʻu lea o loo pulea ai le lalolagi a Satani o loo siʻomiaina i tatou. E mafai faapefea ona tatou ʻalofia lena faalogona lē mamā a o atiina aʻe se mataʻu ma le migao mo Ieova? O le a talanoaina lenei fesili i le polokalame fou o le fonotaga matagaluega mo le tausaga faaleauaunaga e 2002. Ua faamatuaina e faapea, “Ia Outou Matatau i le Atua, ma Avatu ia te Ia le Viiga.” (Faaa. 14:7) O le a tatou malamalama ai i le tele o auala o le a aogā ai iā i tatou taʻitoʻatasi faapea le faalapotopotoga, le mataʻu iā Ieova.
E ui e mafai ona uiga le mataʻu i le popole po o le leai o se lototele ma le palaai e faafesagaʻia ai tulaga faigatā, ae ua taʻua i le Tusi Paia e faapea: “Amuia i latou uma o e matatau ia Ieova.” (Sala. 128:1) I le polokalame o le fonotaga, o le a faailoa mai ai le auala e mafai ona tatou faafetaiaʻia ai luʻi faasaga i le tapuaʻiga moni. O le a tatou iloa ai auala e fesoasoani ai i ē e fou ina ia atiina aʻe lenei mataʻu mamā i le Atua, lea o le a uunaʻia ai i latou ia mananaʻo e auauna atu iā te ia ma o latou loto atoa, tagata atoa, mafaufau atoa, ma le malosi atoa. (Mare. 12:30) E faaiʻu le aso muamua i le lauga a le ovasia o le matagaluega e faapea, “Ia Matuā Faalatalata Atu i Ē E te Alofa i Ai.” O le a ia faamatala mai auala e mafai ai ona tatou mataala pea i taumafaiga a le Tiapolo e faaliliueseina i tatou mai iā Ieova, o tatou aiga, ma o tatou uso Kerisiano.
O le matua o le lauga faasolo e fā vaega i le aso lona lua e faapea, “Ia Matataʻu iā Ieova, ae Lē o Tagata.” O le a faamatalaina i lenei lauga le māfuaaga ma le auala e ao ai ona tatou manumalo i so o se mataʻu e ono taofia ai i tatou mai le faataunuuina atoatoa o la tatou faiva, po o le tausisia o lo tatou faamaoni ma se lotofuatiaifo mamā i aʻoga ma falefaigaluega. O le lauga i le lautele, “Ia Matataʻu i le Atua ma Tausi Ana Poloaʻiga,” e faavae mai i le faasologa o mea tutupu o loo faamatalaina i le Faaaliga mataupu e 14. O le a faaiʻu le fonotaga matagaluega i se faatonuga mautinoa e faapea, “Ia Savavali Pea ma le Matataʻu iā Ieova.”
O le Aʻoga o le Faiva Faatiokarate, o le faaaʻoaʻoga lelei o le Sauniga o le Auaunaga, le lauga o le papatisoga, ma le otootoga o le Suʻesuʻega o Le Olomatamata, o isi mataupu matilatila ia o le polokalame o le a e lē manaʻo e misia. Ia valaaulia au tagata suʻesuʻe o le Tusi Paia ina ia tou auai faatasi. So o se tasi e manaʻo e papatiso, e tatau ona faailoa atu i le ovasia taʻimua i le vave e mafai ai. O le a tatou mananaʻo uma e faatinoina lo tatou mataʻu mamā iā Ieova ma faamamaluina o ia i lou lē misia o se vaega o lenei polokalame matagofie!