Pusa Fesili
◼ O ā ituaiga o taʻu ua fautuaina e faaaogā i le taimi o sauniga a le faapotopotoga?
Ina ua aʻoaʻoina e Iesu ona soo i le tatalo, sa ia faatonuina i latou ia faapea atu ia Ieova, “Lo matou Tamā e.” O lenei manatu i se faiā o se aiga faaleagaga i le vā o ona soo uma, sa faamamafa atili atu ina ua ia fetalai atu ia i latou “o outou uma o le au uso outou.” (Mata. 23:8) E tele taimi sa faaaogā ai e aposetolo ma soo o Iesu le upu “uso” i se uiga tuusaʻo. Sa faasino atu Peteru ia Paulo e faapea, o “Paulo lo tatou uso pele” ma sa tautala foʻi Paulo e faapea o “loʻu uso o Tito,” ma “lo tatou uso o Timoteo.”—2 Pete. 3:15; 2 Kori. 2:13; Epe. 13:23.
I le manatu i lenei faiā māfana faaleagaga, e masani ai lava ona taʻua e Molimau a Ieova le tasi ma le isi o le “uso” ma le “tuafafine.” I le tele o atunuu i Sisifo e latou te taʻua ai faapena faatasi ma le igoa faaiʻu i sauniga a le faapotopotoga, auā o le faaaogāina e lē o taʻimua o igoa muamua, e mafai ona tulaʻi mai ai ni faafitauli i nisi taimi. Afai e fou mai le tagata i a tatou sauniga ma e tatou te leʻi masani lelei i ai, atonu o le a manatu o ia e faapea ua tatou soona faamasani atu naʻuā pe a tatou valaauina o ia i lona igoa muamua, talu ai e masani ona faaaogā ia faaiʻu pe a faapotopoto tagata i sauniga faa-Kerisiano i na atunuu. O le valaau o tagata matutua i o latou igoa muamua, e manatu i ai nisi e faapea o le lē faaaloalo.
Ae peitaʻi, e ese le tulaga lea i tagata mai atumotu o le Polenisia. I Samoa, e masani ai ona faaaogā igoa muamua e oo lava i tagata matutua ma i faatasiga aloaʻia, ma e lē manatu ai i lenei mea e faapea o se lē faaaloalo. Na i lo o le faaaogāina o le faaiʻu lava lea e tasi mo tagata uma o le aiga e pei ona masani ai ona faia i atunuu i Sisifo, e faaopoopo e tagata Samoa le igoa muamua o le tamā (po o le tane), po o lona suafa matai, e faailoa ai se tagata. Ona o lenei faiga, afai e tatou te faaaogā le upu “uso” faatasi ma le ‘faaiʻu’ o se tagata Samoa, o le a manatu ai la e faapea o loo faasino atu i lona tamā na i lo o le uso.
O le mea lea, e talafeagai ai i sauniga a faapotopotoga Samoa ona faaaogā le upu “uso” ma le “tuafafine” faatasi ma igoa muamua o i latou o loo auai.
Pe a avea se tagata Samoa o se matai, e masani lava ona faaaogā lona suafa matai na i lo lona igoa muamua ma faalagi o ia “Lau Afioga” po o “Lau Tofā.” E ui e talafeagai lenei mea i le nuu po o le aiga, ae faapefea la i sauniga a le faapotopotoga? Ia manatua upu apoapoaʻi a Iesu o loo sii mai i le amataga e faapea, “o outou uma o le au uso outou.” O lea la, i a tatou sauniga, e lē talafeagai mo uso po o tuafafine ua iai o latou suafa matai ona valaau pe faalagi “Lau Afioga” po o “Lau Tofā,” auā o le a foliga mai ai e maualuga aʻe i latou na i o latou uso. (Mata. 20:25-27) Na i lo o lea, e tatau lava ona valaau i latou o le “uso” po o le “tuafafine” faatasi ai ma o latou suafa matai po o le igoa muamua, e faalagolago i le suafa latou te mananaʻo e faaaogā.
E tatou te lē valaauina ia tagata fiafia fou o se “uso” po o se “tuafafine” talu ai e leai so latou tulaga i le faiā faaleagaga o le aiga o le Atua. Na i lo o lea, e tau lava ina faaaogā o latou igoa muamua. Afai o le tagata faatoʻā fiafia mai o se papalagi, e mafai ona e faaaogā faatasi le igoa muamua ma le faaiʻu. I le isi itu, afai ua agaʻi atu se tagata i le tuuina atu ma manatu ia te ia lava o se tasi o Molimau a Ieova, atonu la e lē teena le faaaogā o lona igoa muamua faatasi ma le upu “uso” po o le “tuafafine.”
Pe a tatou faaaogā le upu “uso” po o le “tuafafine” i a tatou sauniga a le faapotopotoga, ua faailoa ai se faiā matuā faamanuiaina, se faiā faaleaiga i le tausiga a le Tamā e toʻatasi, o Ieova le Atua. (Efe. 2:19e) O se sootaga e sili atu ona matuā vavalalata ma sili atu ona tautele na i lo o se isi lava faiā.