Ia Molimau Atu i le Avea o Oe o se Tuaoi Lelei
1 Na fetalai Iesu ina ia “alofa atu i lē lua te tuaoi, ia pei o oe lava ia te oe.” (Mata. 22:39) E mautinoa lava o loo e faia ‘mea lelei’ i ou uso talitonu, ae pe mafai ona faalautele atu lou alofa i tagata na o loo nonofo latalata ane ia te oe? (Kala. 6:10) I ā auala?
2 E Ala i le Faailoaina Atu o Oe: Pe e iloa e ou tuaoi o oe o se Molimau? Afai e leai, aiseā e te lē asiasi atu ai ia i latou i le taimi o le auaunaga i le fanua? Atonu e faateʻia ai oe i ni iʻuga! Pe afai e lelei ia te oe, ia taumafai e molimau lē fuafuaina atu ia i latou. Pe a e iai i fafo o lou fale, atonu e te vaaia ai i latou o galulue i lo latou lotoā, pe e savalivali ane foʻi i le auala. Faafeiloaʻi atu ia i latou ma le laumata fiafia. Taumafai e talanoa atu e uiga i ou talitonuga, le mea e tū ai le Maota o le Malo, ma mea e faia ai iinā, ma faailoa atu foʻi ia i latou po o ai nisi mai lea vaipanoa o auai. Ia valaaulia i latou i sauniga. Ia maumauaʻi e avatu se molimau māeʻaeʻa e uiga i le tala lelei ia i latou uma e te iloa.—Galu. 10:42; 28:23.
3 E Ala i Au Amio e Sili Ona Lelei: O au amioga faaleuō, e faamaonia ai lou tagata ma e ono tatala ai le auala e avatu ai se molimau. O lau amio foʻi e ‘viia ai le aʻoaʻoga a le Atua.’ (Tito 2:7, 10) Ia faaali atu le naunau moni i ou tuaoi. Ia faaleuō ma ia malamalama. Ia faaaloalo i a latou aiā totino ma ia toʻafilemu mea uma. Afai e maʻi se tasi o i latou, ia magafagafa ma ofo atu le fesoasoani. Afai e siitia atu se aiga fou i lo outou nuu, ia afe i ai ma faafeiloaʻi ma le fiafia i latou. O na gaoioiga agalelei, e avatu ai se taaʻiga lelei ma e faafiafiaina ai Ieova.—Epe. 13:16.
4 E Ala i Foliga Vaaia o Lou Fanua: O le avea o se tuaoi lelei e aofia ai le tausia lelei o lou fale ina ia foliga lelei mai. O se fale ma se lotoā e mamā ma tosina atu i ai le vaai e avea lava lena o se molimau. Ae o se fale e palapalā po o le taatitia solo foʻi o mea e lē o toe faaaogāina, e ono māfua ai ona lē fiafia tagata i le feʻau o le Malo. I lea, e matuā tāua lava le tausia ia mamā lou fale, lotoā ma taavale ma ia iai i se tulaga lelei.
5 O le faaalia o le manatu mamafa ia i latou o loo i fafo atu o le faapotopotoga Kerisiano, ua faaalia atu ai le alofa mo ou tuaoi. O le ā se iʻuga e ono iʻu i ai? Atonu e “latou te vaavaai ai i a outou amio lelei,” ona “vivii atu ai lea [o nisi o i latou] i le Atua.”—1 Pete. 2:12.