E Sili Ona Lelei pe a Faigofie ma Manino
1 Aiseā e masani ai ona uaʻi atu manatu o tagata i talavou o ē e talaʻi atu le feʻau o le Malo ia i latou? O le tasi o māfuaaga, ona e faigofie a latou faaupuga. Atonu e manatu nisi tagata talaʻi e faapea, ina ia uigā la latou molimau atu e manaʻomia ai se taulimaga i ni upu maotua. Ae peitaʻi, ua faaalia i mea tutupu e faapea e sili atu ona lelei se taulimaga e faigofie ma manino.
2 Sa folafola atu e Iesu le Malo o le Atua i ni upu faigofie ma le tuusaʻo ma sa aʻoaʻoina foʻi ona soo ina ia faia faapea. (Mata. 4:17; 10:5-7; Luka 10:1, 9) Sa ia faaaogā ni upu tomua faigofie, fesili ma talafaatusa ina ia puʻea ai manatu o lana ʻaufaalogologo ma pāʻia ai o latou loto. (Ioa. 4:7-14) E lelei ona tatou faataʻitaʻi i ana faaaʻoaʻoga ma avatu ni taulimaga e faigofie ona malamalama i ai.
3 O le “tala lelei o le malo” o le feʻau lea o loo tatou folafola atu. (Mata. 24:14) O le faaaogāina o le Malo e fai ma au matua autū, o le a fesoasoani e faafaigofie ai lau taulimaga. Talanoa i mea o loo popole i ai lau ʻaufaalogologo. O fafine e masani lava ona sili atu ona fiafia i o latou aiga na i lo o mataupu faapolotiki. O mea e sili ona popole ai se tamā, o lana galuega ma le saogalemu o lona aiga. E naunau tagata talavou i lo latou lumanaʻi; o tagata matutua, e popole i le soifua mālōlōina lelei ma lo latou saogalemu. E masani lava ona sili atu ona popole tagata i mea o loo tutupu i lo latou atunuu na i lo o mea o loo tutupu i atunuu mamao. Pe a uma ona talanoa i mea e masani ona naunau i ai tagata, ona tataʻi loa lea o le manatu i faamanuiaga o le a olioli ai le fanau a tagata usiusitai i lalo o le pulega a le Malo o le Atua. O ni nai upu faigofie ua filifilia lelei ma se mau, e mafai ona avea o se auala sili e faagaee ai le fiafia o lau tagata faalogologo.
4 E mafai ona e amata se talanoaga i lou faapea atu:
◼ “E lē taumatea e te ioe ua malaia le fanau a tagata i le tele o faamaʻi e lē o mafai ona maua ni togafitiga. Ae po ua e silafia ua folafola mai e le Atua e lē o toe umi se taimi ona ia soloiesea lea o faamaʻi eseese uma, faapea ma le oti?” Faatali mo se tali ona faitau lea o le Faaaliga 21:3, 4.
5 I le faaaogāina o ni taulimaga manino ma le faigofie, tau ina ia e pāʻia ai mafaufau ma loto o le toʻatele o tagata i lau oganuu, e fesoasoani ai ia i latou e malamalama ia Ieova faapea le faamoemoe o le olioli i le ola e faavavau.—Ioa. 17:3.