Ia Faamuamua Pea le Malo
1 O le faamuamuaina o le Malo o le Atua i le olaga ma faaauau ai pea, e lē faigofie pe a tatou fesagaʻi ma omiga tau i le tamaoaiga po o isi faafitauli. E faapefea ona tatou faamuamua pea le Malo pe a mapuna aʻe faafitauli? Ae faapefea pe a ofoina mai iā i tatou se galuega o le a tatou misia ai sauniga, pe e faalavelavea ai la tatou auaunaga i le fanua? Po ua tatau ai ea la ona faalonalua le Malo i le olaga?
2 E Manaʻomia le Faatuatua Malosi: Pe a tofotofoina lo tatou faatuatua i na tulaga, e lē tatau lava ona tatou faagaloina le folafolaga a Ieova ma le faamautinoaga a Iesu e uiga i le lagolagosua a le Atua, pe a tatou saʻili muamua le Malo. (Sala. 37:25; Mata. 6:31-34) E mafai e omiga ma taaʻiga mai le lalolagi ona faanenefuina la tatou vaai ma taofia ai i tatou mai le faamuamuaina pea o le Malo. Ua faataga e nisi ia faamoemoega i tulaga maualuluga i galuega po o le mauaina o se totogi tele e avea o se mea e sili ona tāua i le olaga. Ae peitaʻi, i le pei o Paulo, e manaʻomia ona tatou fuafua lelei po o le ā moni lava e tāua i le olaga.—Fili. 3:7, 8.
3 Pe e Manaʻomia ni Fetuutuunaʻiga? Na faapea mai se tagata talaʻi: “O loʻu lotoatoa sa i laʻu pisinisi—sa sili ona ou fiafia i ai. Sa iai loʻu lagona e mafai pea lava ona avea aʻu ma Molimau e ui lava o loo tuuina atu le tele o loʻu taimi i laʻu pisinisi.” Ae sa iai pea sona lagona malosi e faapea e sili atu mea na te mafaia e auauna ai iā Ieova. I se taimi mulimuli ane, sa ia tuua ai le pisinisi lea sa avea ma toʻatugā i lona agaʻigaʻi i luma faaleagaga. I lea, o le taimi lava na tuutoina atoa atu ai o ia i le galuega o le Malo, sa mafai ai ona ia faapea mai: “Ua ou lagona nei ua taulau manuia loʻu olaga i le silafaga a Ieova, o le mea lea e sili ona tāua.”
4 O se mea e faamālō ai, ona o le toʻatele ua tuua a latou galuega totogi ma faamoemoega mo le mauaina o ni totogi tetele, ae ua faafaigofie o latou olaga, ma ulu atu i le auaunaga faataimi atoa. Ua faia faapea e auauna o le faiva talavou nofofua, ma toeaina o ē na auai i le Aʻoga mo Toleniga i le Faiva, ma o loo olioli i faaeaga matagofie o le auaunaga. I le faataʻitaʻi atu i le faaaʻoaʻoga mataʻina a Paulo, ua latou maua ai le lotomalie moni i mea faaletino o loo latou maua.—1 Kori. 11:1; 1 Timo. 6:6-8; Epe. 13:5.
5 E ui e tauemu mai le lalolagi i la tatou vaaiga i le olaga, ae o loo tatou maua le faamanuiaga a Ieova. (1 Kori. 1:26-31) Pe e lē faalaeiauina ai ea i tatou i le iloa o le a ia faaaogāina atoatoa i tatou i le mea e mafai ai, ma o le a fesoasoani iā i tatou e faataunuuina lana galuega? O le avanoa o loo tatou mauaina nei e folafola atu ai le Malo o le Atua ua faavaeina, o le a lē toe maua lava. O lea, o le taimi lenei e tatau ai ona faamuamua pea le Malo i o tatou olaga.