‘O le a Faapefea Ona Latou Faalogo?’
1 Sa matuā faamamafa atu e Iesu i lona faapea atu: “Ia muai talaʻiina foi le tala lelei i nuu uma lava.” (Mare. 13:10) E ui lava i a tatou taumafaiga filigā, ae o loo iai pea le faitau selau miliona o tagata o ē e leʻi oo atu lava i ai se molimau totino. Ua faasāina e nisi malo la tatou galuega. E tele atunuu o loo vave faatupulaʻia pea lo latou faitau aofaʻi. I lea, ‘o le a faapefea ona latou faalogo?’—Roma 10:14.
2 Ia Talitonu Atoatoa iā Ieova: E tatau ona tatou manatua e silafia e Ieova le tulaga o loto o tagata uma. E tusa lava po o le ā le tulaga o le tagata, ae afai e na te saʻili ma le faamaoni i le upu moni e uiga i le Atua, o le a ia mauaina lava.—1 No. 28:9.
3 Sa popole Aperaamo i tagata sa nonofo i Sotoma ma Komoro. Ae na faamautinoa atu e le Atua iā te ia e faapea, o le a lē faaumatia Sotoma e tusa lava pe sa na o se toʻasefulu tagata amiotonu na maua ai. (Kene. 18:20, 23, 25, 32) E leʻi faaumatia lava e Ieova ia tagata amiotonu faatasi ma ē amioleaga, e pei ona sa faaalia i le faasaoina o Lota ma ona afafine.—2 Pete. 2:6-9.
4 Sa iai se taimi na manatu ai Elia sa na o ia lava o loo auauna i le Atua moni. Ae peitaʻi, sa faamautinoa atu e Ieova iā te ia e faapea, sa lē na o ia, ma o le galuega na ia amataina o le a faaiʻuina. (1 Tu. 19:14-18) Ae faapefea le tulaga i o tatou aso?
5 Ia Pisi Pea i le Auaunaga i le Atua: O le telē o le galuega molimau atu lea e tatau ona faia, e tatou te lē o iloa. O Ieova e fitoi tonu lava i ai lenei galuega ma o loo faaaogāina ana agelu e latou te vaavaaia. (Faaa. 14:6, 7) O ia e filifilia po o le ā le tele e avatu ai le molimau i atunuu uma lava. Afai e finagalo i ai Ieova, e na te faamautinoa la ua faasalalau atu le feʻau o le Malo i se tulaga sa tatou leʻi mafaufauina, ina ia mafai ai e le isi toʻatele o tagata ona “logona mai . . . le upu o le tala lelei . . . ma latou talitonu i ai.” (Galu. 15:7) O mea e faia e Ieova, o le a matuā ōgatusa ma le ituaiga o Atua e iai o ia—o se Atua alofa, atamai ma faamasinotonu.
6 O se faaeaga mo i tatou le galulue e ōgatusa ma le finagalo o Ieova, i le faia o le mea sili tatou te mafaia, ina ia mafai ai ona faalogo tagata uma i le tala lelei.—1 Kori. 9:16.