Faaauau Ona Maua Aogā Mai Le Olomatamata ma le Ala Mai!

Ona o lea ua lē o toe faaauauina ona auina mai i le meli ia tusiga i mekasini o Le Olomatamata ma le Ala Mai!, o le a manaʻomia ai la ni taumafaiga e faamautinoa ai e lē o misia e i tatou, ma i latou o loo tatou talaʻi atu i ai ia se lomiga e tasi.

Kopi Totino: Pe afai ua uma le aogā o lau tusiga totino, e ao ona toe faaopoopo lau ota o loo faia i le taimi nei i le laulau o mekasini. E ao i mātua ona ota ia lava mekasini ina ia maua e tagata taʻitoʻatasi o le aiga lana ia lava kopi. O le tusiaina o lou igoa i lau lava kopi totino, o le a faamautinoa ai ua lē ofosesēina i le fanua. Pe a taunuu mai ia ota o mekasini, o le a faailoa vave atu loa e uso o loo gafa ma mekasini lomiga ia ua maua i le Maota o le Malo.

Alāmekasini: E ao i tagata talaʻi ona taumafai e faia se alāmekasini i tagata lotofiafia uma lava o ē e mananaʻo e fia maua ia lomiga taʻitasi. O lou alu o oe lava e avatu mekasini i na tagata, o le a maua ai ni avanoa e atiina aʻe ai le fiafia lea ua faaalia ma amata ai ni suʻesuʻega faale-Tusi Paia.—Tagaʻi i La Tatou Faiva o le Malo o Oketopa 1998, itulau e 8.

I Latou e Iai Manaʻoga Faapitoa: Afai e faaalia e se tagata le naunau moni ae nofo i se oganuu e leʻi tofia i se faapotopotoga, e mafai ona faia ni fuafuaga faapitoa e na te mauaina ai ia mekasini e ala i se tusiga e auina atu i le meli. Afai o se tagata e nofo i le oganuu a se faapotopotoga ae lē mafai ona oo atu i ai mekasini e ala i se alāmekasini ae naunau moni e maua ni mekasini, ia talanoa lea tulaga ma le Komiti o le Auaunaga a le Faapotopotoga. Afai e latou te ioeina, ona mafai loa lea ona faia se tusiga mo le tagata fiafia. E mafai ona faaaogā pepa faatulagaina mo tusiga, (M-1 ma le M-101) mo lea fuafuaga.

E mafai ona tatou mautinoa o le a faaauau ona faamanuia e Ieova a tatou taumafaiga uma e faasilasila atu ai le Malo e ala i Le Olomatamata ma le Ala Mai!