Auaufaatasi e Vivii Atu iā Ieova
1. O le ā le matua o le tauaofiaga ma aiseā ua tatau ai iā Ieova la tatou viiga?
1 O Ieova e silisili ese lona mana, e lē masuʻesuʻeina lona atamai, e tonu ana faamasinoga ma o le alofa lava ia. I le avea ma Lē na Foafoaina Mea, o Lē Foaʻi Ola, o le Pule Silisili Ese, ua na o ia e tatau i ai la tatou tapuaʻiga. (Sala. 36:9; Faaa. 4:11; 15:3, 4) I lenei tausaga, o le a faamalosia e le Tauaofiaga Itumalo “Ia Avatu i le Atua le Viiga” ia la tatou filifiliga e vivii atu iā te ia o le Atua moni e toʻatasi.—Sala. 86:8-10.
2, 3. E faapefea i le fuafua lelei ona fesoasoani iā i tatou e maua ai aogā atoatoa?
2 E Manaʻomia Ona Fuafua Lelei: Ina ia tatou mauaina atoatoa aogā mai le taumafataga faaleagaga ua saunia e Ieova, e tāua ai le fuafua lelei. (Efe. 5:15, 16) Pe ua uma ona fai au faatulagaga mo le mea e api ai, o auala mo femalagaaʻiga, ma aso e mālōlō ai mai le galuega po o le aʻoga? Aua e te tuua nei mea tāua e faia i le taimi mulimuli. Afai e tuai ona e talosaga atu mo ni aso mālōlō, atonu o le a e misi se vaega tāua o lenei aufaatasiga fiafia. E manaʻomia ona tatou auai uma i le polokalame atoa.
3 Ia fai ma ou sini le taunuu vave i le nofoaga e faia ai le tauaofiaga i aso taʻitasi. O le faia faapea o le a mafai ai ona e nofoi lelei a o leʻi faia le pese amata, ma fesoasoani ai foʻi iā te oe ina ia saunia lelei faalemafaufau a o e faalogologo lelei i aʻoaʻoga o loo tolaulau mai. O le a tatala le nofoaga mo le tauaofiaga i le valu i le taeao i aso taʻitasi. Faamolemole aua le taofia ni nofoa e ese mai i nofoa o lou aiga ma tagata tou te faimalaga faatasi.
4. Aiseā ua talosagaina ai i tatou uma ina ia aumai meataumafa mo le aoauli i le tauaofiaga?
4 O loo talosagaina tagata uma ina ia aumai ni a latou meataumafa o le aoauli na i lo o le tuua o le nofoaga o loo faia ai le tauaofiaga mo le faatauina mai o ni meataumafa i le taimi o le mālōlōga. O la outou lagolagosua mai i lenei faatulagaga o le a fesoasoani i le atiina aʻe o se siʻomaga toʻafilemu ma lava ai le taimi e faatasitasi ai ma uso talitonu. (Sala. 133:1-3) Faamolemole e ao ona manatua o ipu mataʻetaʻe e tuu ai meaʻai ma meainu faapea foʻi ma le ʻava malosi, e lē faatagaina i le nofoaga o le tauaofiaga.
5. E mafai faapefea ona tatou amata sauniuni o tatou loto mo le tauaofiaga?
5 Ia Faalogo ma Aʻoaʻo: Na tatalo Esera ina ia saunia lona loto e taliaina afioga a le Atua. (Esera 7:10) Sa faasaga atu lona loto i aʻoaʻoga a Ieova. (Faata. 2:2) E mafai ona amata sauniuni o tatou loto mo le tauaofiaga e tusa lava pe e leʻi tuua le aiga, e mafai ona tatou mafaufau loloto i le matua o le tauaofiaga ma talanoaina faatasi ma lo tatou aiga.
6. O le ā e mafai ona fesoasoani iā i tatou e taulaʻi atu ai pea i le polokalame? (Tagaʻi i le pusa.)
6 I se nofoaga telē, e mafai ona tele ni mea ma ni leo e ona faalavelavea ai lo tatou uaʻi atu. O na mea e faigofie lava ona tataʻieseina ai o tatou mafaufau mai le failauga. Pe a tupu lenā mea, o le a tatou lē mauaina la ia manatu tāua. O fautuaga o loo maua i le pusa o loo iai i inei o le a mafai ona fesoasoani iā i tatou e faaleleia ai lo tatou uaʻi atu.
7, 8. E mafai faapefea ona tatou faaalia le manatu mamafa mo isi?
7 Ia Manatu Mamafa i Isi: E mafai ona faaaogā mea puʻeata ma vitiō e puʻeina ai ata a o faagasolo le polokalame, ae ina ia ʻalofia le faalavelave i isi, e mafai ona e puʻeina mai i le mea o loo e nofo ai. O telefoni feaveaʻi e tatau ona faatulaga ia aua neʻi tatagi ina ia lē faalavelave ai i isi.
8 Maʻeu lo tatou tepa taulaʻi atu e auaufaatasi e vivii atu iā Ieova! Ia tatou maumauaʻi e viia o ia e ala i le auai i vaega uma, i le faalogologo lelei ma le faatatauina o mea ua tatou aʻoaʻoina.—Teu. 31:12.
[Pusa i le itulau 4]
Faalogo i Tauaofiaga
▪ Ia manatunatu i matua o lauga
▪ Ia suʻe mau o le Tusi Paia
▪ Ia faia ni faamaumauga pupuu
▪ Ia tusi faamatilatila manatu e ao ona faatatauina
▪ Ia toe autalu mea na e aʻoaʻoina