Tauaofiaga Itumalo a Molimau a Ieova 2003 “Ia Avatu i le Atua le Viiga”
1 Na poloaʻi mai Ieova e ala i lana perofeta faamaoni o Isaia e faapea: “Faalogo mai ia iā te aʻu loʻu nuu e; oʻu tagata e, uaʻi mai ia o outou taliga iā te aʻu.” (Isa. 51:4) I nei taimi o le iʻuga ua faateteleina ai le faigatā, pe tatou te lē ioe ea o le taimi sili lenei e tāua ai lo tatou uaʻi atu i poloaʻiga a Ieova, na i lo o se isi lava taimi? O se tasi o auala e ‘uaʻi atu ai o tatou taliga’ iā Ieova, o le usiusitai i lana poloaʻiga ina ia faapotopoto faatasi mo le tapuaʻiga. O loo tatou matuā aloalo atu mo lenei avanoa faapitoa o le a saunia i a tatou tauaofiaga itumalo faaletausaga! Ua toe fuafuaina foʻi e le Vaega Pule o Molimau a Ieova tauaofiaga itumalo e tolu, e faia i le oganuu o le Ofisa i Samoa i le 2003. Amerika Samoa: Lee Auditorium, Utulei, Setema 26-28, 2003 (faa-Samoa). Samoa: Maota o le Malo, Siusega, Setema 19-21, 2003 (faa-Peretania). Maota Fono o Molimau a Ieova, Sinamoga, Oketopa 3-5, 2003 (faa-Samoa).
E pei ona faailoa atu i le lomiga o Le Olomatamata o Iulai 1, 2002 e faapea, o le a faia foʻi tauaofiaga faavaomalo i atunuu ua filifilia, ma o le a auai ai sui usufono mai le lalolagi aoao. E ui lava e lē o tagata uma e mafai ona auai i tauaofiaga faavaomalo, ae o le a pei lava nei tauaofiaga itumalo o tauaofiaga faavaomalo. O le tele o nofoaga o le a faia ai tauaofiaga, o le a auai ai misionare ma o le a maua ai le avanoa e faalogologo atu ai i tala o mea na tutupu i la latou auaunaga. O le ā e mafai ona tatou faia ina ia maua atoatoa ai aogā mai fuafuaga ia ua faia mo tauaofiaga o lenei tausaga?
3 Ia Auai i Aso Uma: Ina ia maua atoatoa aogā mai faatonuga ua saunia mai e le auauna faamaoni ma le mafaufau, e manaʻomia ona tatou faamautinoa ua tatou auai i le polokalame atoa. (Mata. 24:45) Pe e manaʻomia ona e talosaga atu i lou pule i le galuega mo ni aso mālōlō, ina ia auai ai i aso uma o le tauaofiaga? A o leʻi talosaga atu Neemia i le tupu o Aretaseta mo se faatagaga e alu ai i Ierusalema ina ia toe fausia pa o le aai, na ia ‘tatalo atu i le Atua o le lagi.’ (Nee. 2:4) E tatau foʻi ona e tatalo atu faapena iā Ieova mo le lototele e talosaga atu ai i lou pule i le galuega, mo ni aso mālōlō ina ia e auai ai i aso uma e tolu o le tauaofiaga. Ae faapefea pe a musu lou pule e faataga atu oe e fai ni ou aso mālōlō? Atonu o le a tali lelei mai pe a faamatala atu i ai e faapea, o faatonuga ia e maua i a tatou tauaofiaga, ua fesoasoani iā i tatou ina ia avea ai o ni tagata faigaluega faamaoni, filigā, ma maufaatuatuaina. E lē gata i lea, pe afai e iai ni o tatou tauaiga lē talitonu, o se mea lelei le faailoa vave atu iā i latou o fuafuaga mo a tatou tauaofiaga.
4 Fesoasoani iā i Latou e Iai Manaʻoga Faapitoa: Po o iai nisi i la outou faapotopotoga o ē e ono manaʻomia se fesoasoani ina ia auai i le tauaofiaga? O manaʻoga faapitoa o tagata ua matutua, o latou e lē atoatoa le malosi o le tino, po o i latou i le auaunaga faataimi atoa, e tausia e o latou lava tauaiga Kerisiano, ae e mafai foʻi e toeaina ma isi o loo malamalama i tulaga o i latou na ona avatu se fesoasoani alofa.
5 Auai i se Tauaofiaga Faavaomalo: Faamolemole ia mātau le mea lenei, e na o sui usufono ua faamaonia e tatau ona auai i tauaofiaga faavaomalo i Sini ma Honolulu.
6 O i Tatou o Mataaga i le Lalolagi: Po o vaaia e tagata le eseesega o Molimau a Ieova ma tagata o le lalolagi? Ioe, o le mea moni lenā! Seʻi mātau nisi o faamatalaga mai pule o fale talimālō i se aai: “E masani ona matou feutagaʻi ma isi tauaofiaga, ae e sili atu ai outou i le felagolagomaʻi ma le agalelei.” “I le vaiaso ua teʻa, na nonofo ai se isi vaega faalelotu iā i matou. Sa matuā mātauina le eseesega o outou ma i latou.” “E mautinoa e mafai ona matou faatalitalia la outou fesoasoani ma le felagolagomaʻi.” Po ua lē fesoasoani ea na faamatalaga iā i tatou e iloa ai ua aogā le “poto mai lugā” i o tatou uiga? (Iako. 3:17) Talu ai ua avea i tatou ma “mataaga i le lalolagi,” seʻi faailoa atu i a tatou amio i taimi uma le mamalu ma le matagofie o lo tatou Atua, o Ieova.—1 Kori. 4:9.
7 Talu ai “o le a mavae atu le tū o le lalolagi nei,” e tatou te manaʻomia ai a tatou tauaofiaga itumalo, ina ia fesoasoani iā i tatou e tepa taulaʻi atu ai i mea faaleagaga. (1 Kori. 7:31) O le faia o fuafuaga ina ia auai i aso uma o le tauaofiaga e manaʻomia ai ni taumafaiga, ae e aogā. I lenei tausaga, ua sauniunia ai le Tauaofiaga Itumalo “Ia Avatu i le Atua le Viiga” ina ia fesoasoani iā i tatou e tutumau ai, a o tatou faatalitali atu i le faaooina mai o le faamasinoga a Ieova i le lalolagi a Satani. Tau ina ia aua neʻi o tatou faatagaina so o se mea e taofia ai le mauaina o faatonuga ua saunia e Ieova mo i tatou.—Isa. 51:4, 5.
[Pusa i le itulau 3]
Taimi o le Polokalame
Aso Faraile ma le Aso Toonaʻi 9:30 taeao –5:00 afiafi
Aso Sa 9:30 taeao - 4:05 afiafi