O le Afioga a le Atua o le Upu Moni Lea
1. O ā faamatalaga tāua o loo maua i le Tusi Paia?
1 Ua tusi mai le faisalamo e faapea: “E moni lava lau afioga.” (Sala. 119:160) E ala mai i lana Afioga faagaeeina ua aumaia ai e Ieova tali faamalieloto i fesili e pito sili ona tāua o le olaga. Ua ia ofoina mai faamāfanafanaga ma le faamoemoe iā i latou o loo fesagaʻi ma faafitauli. Ua ia faaalia mai foʻi iā i tatou le auala e faalatalata atu ai iā te ia. Na faapea mai se tasi fafine sa faaalia le lotofaafetai: “O le aʻoaʻoina o le upu moni mai le Tusi Paia, e tai pei o le alu ese mai se potu pogisa ma ulu atu i se potu malamalama.” Po o e faia ea ni taumafaiga e faasoa atu ai le upu moni mai le Afioga a le Atua i so o se avanoa?
2. Ua mafai faapefea e le Tusi Paia ona faaleleia olaga o tagata?
2 Le Malosi e Faaliliuina ai ma Tosina Mai ai le Lalolagi Atoa: Ua iai i le upu moni o le Tusi Paia le malosi e pāʻia ai loto ma faaliliuina ai olaga. (Epe. 4:12) Ua faapea mai se fafine talavou e suafa iā Rosa sa aafia i faiga faatalitane ma sa puleaina e le ʻava malosi ma fualaau faasāina: “I se tasi aso a o oʻu iai i se tulaga matuā mafatia lava, sa talanoa mai ai iā te aʻu se ulugalii Molimau i le auala e mafai ai e le Tusi Paia ona fesoasoani iā i tatou e foʻia o tatou faafitauli. Sa amata ona ou suʻesuʻeina le Afioga a le Atua, lea sa ou matuā fiafia lava i ai. Pe a ma se masina ae ou maua loa le lototele e amata ai se olaga mamā fou. O lea ua iai nei loʻu faamoemoe mo le olaga ma ua ou lē toe manaʻomia ai se fesoasoani mai le ʻava malosi ma fualaau faasāina. Talu ai na ou matuā manaʻo lava e avea aʻu ma uō a Ieova, sa ou taumafai malosi e ola e tusa ai ma ana tapulaa. Pe ana lē seanoa le poto mai le Afioga a le Atua, e mautinoa e oo mai i le taimi lenei ua leva ona ou pule i loʻu ola.”—Sala. 119:92.
3. Aiseā e lē tatau ai ona tatou faatalatū mai le faailoa atu o le feʻau o le Tusi Paia i isi?
3 E ese mai i le tele o tusi i aso nei, ua avea le Tusi Paia o se tusi ua tosina mai ai tagata “mai atu nuu uma, ma aiga, ma nuu, ma gagana eseese.” (Faaa. 7:9) O le finagalo o le Atua ia “faaolaina o tagata uma lava, ma ia oo ina iloa lelei le upu moni.” (1 Timo. 2:4) O lea la, e lē tatau ona tatou manatu faapea o le a lē fia faalogo mai le tagata i le tala lelei ona o lona talaaga. Na i lo lenā, ia faailoa atu le feʻau o le Malo i tagata uma, i le faaaogāina o le Tusi Paia i so o se avanoa lava.
4. E mafai faapefea ona tatou faaaogā le Tusi Paia pe a avatu se molimau?
4 Ia Faaaogā le Tusi Paia: E tele avanoa e faaaogā ai le Tusi Paia i le faiva. Pe a ofo atu se mekasini, ia taumafai e faaaofia ai ma le mau o loo iai i le taulimaga. Ua iloa e nisi le aogā o le faitauina o se mau ua filifilia i la latou faatomuaga pe afai o loo faaaogā le lomiga o loo ofo mo le masina. Pe a faia toe asiga, ia faitau atu se mau se tasi pe sili atu foʻi i taimi uma e asiasi atu ai e fesoasoani ai i lē e ona le fale, ina ia faatuputupulaʻia ai lona mauaina o le poto saʻo. Pe a faia se suʻesuʻega faale-Tusi Paia, ia faaautū atu le talanoaga i mau autū. Pe afai e lē o auai i le faiva, ia alu ma ave sau Tusi Paia e faaaogā i taimi e maua ai avanoa e molimau lē fuafuaina ai.—2 Timo. 2:15.
5. Aiseā e tatau ai ona tatou finafinau e faaaogā le Tusi Paia i la tatou faiva?
5 Tau ina ia tatou fesoasoani i isi ina ia mauaina aogā mai le mana faagaeeina o le upu moni o le Afioga a le Atua, e ala i le faaaogāina o le Tusi Paia i so o se avanoa talafeagai i la tatou faiva.—1 Tesa. 2:13.