Ia Lotofaafetai mo le Alofa Mutimutivale o le Atua
1 A o leʻi avea le aposetolo o Paulo ma Kerisiano, sa ia matuā tetee malosi i le salalau atu o le Faa-Kerisiano. Peitaʻi, ona sa ia gaoioi ma le lē iloa, na faaalia ai iā te ia le alofa mutimutivale o le Atua. Na faaalia le alofa tunoa o Ieova, ma tofia Paulo i se galuega tāua o le talaʻi. Sa matuā faatāuaina e Paulo lenā tofiga. (Galu. 26:9-18; 1 Timo. 1:12-14) O le lotofaafetai i le alofa mutimutivale o Ieova na uunaʻia ai Paulo e faatinoina ma le tinoū lana faiva.—2 Kori. 12:15.
2 O le alofa mutimutivale o le Atua, ua tatou mauaina ai foʻi se faiva. (2 Kori. 4:1) E mafai foʻi ona tatou pei o Paulo i lo tatou lotofaafetai i le alofa mutimutivale o le Atua, e ala i le finafinau e fesoasoani atu i isi ia agaʻigaʻi i luma faaleagaga. O se tasi o auala e tatou te faia ai lenei mea o le amataina lea ma faia suʻesuʻega faale-Tusi Paia ma tagata.
3 Amataina o Suʻesuʻega Faale-Tusi Paia: O se auala e amataina ai suʻesuʻega faale-Tusi Paia, o le faavaeina lea o se alāmekasini. A o tatou asiasi atu e lē aunoa iā i latou e masani ona tuu ai mekasini, o le a tatou iloa lelei ai mea o loo latou manatu mamafa i ai. E iai le taimi e sau ai se mataupu i se tasi o mekasini e mafai ona avea ma auala e amataina ai se suʻesuʻega faale-Tusi Paia i le polosiua o le Manaomia. I asiasiga e sosoo ai, atonu e mafai ona faaauau le talanoaga i le polosiua o le Manaomia pe a tuuina mekasini i le tagata o le aiga.
4 E Manaʻomia le Tatalo ma Taumafaiga: O le tatalo faatasi ma taumafaiga maumauaʻi o le a faaleleia atili ai la tatou galuega talaʻi. Na tatalo se tasi o tuafafine paeonia e tasi lana suʻesuʻega sa iai, ina ia faamanuia mai Ieova iā te ia i nisi suʻesuʻega faale-Tusi Paia. Sa gaoioi foʻi le tuafafine e ōgatasi ma ana tatalo. Sa ia toe iloiloina lelei lana faiva ma iloa ai faapea, na te leʻi faataʻitaʻia le faia o ni suʻesuʻega faale-Tusi Paia ina ua ia toe asia tagata. Sa amata loa ona ia faia faapea, ma e leʻi umi ae ia mauaina loa nisi suʻesuʻega se lua.
5 Maʻeu se faaeaga ua tatou maua i le auai i le faalauiloa atu o “le tala lelei o le alofa tunoa o le Atua”! (Galu. 20:24) Tau ina ia avea le lotofaafetai mo le alofa mutimutivale o le Atua e uunaʻia ai i tatou e maumauaʻi e fesoasoani atu i isi ina ia maua aogā o le alofa tunoa o Ieova.