E Maua le Olioli i le Molimau Atu o se Vaega
1 Ina ua aauina atu soo e toʻa 70 e talaʻi, na aʻoaʻoina i latou e Iesu i tala e fai atu, sa faatulaga i latou e ō taʻitoʻalua, ma taʻu atu iā i latou le oganuu e tatau ona latou talaʻia. O le faia faapea na latou mauaina ai le olioli. (Luka 10:1-17) E faapena foʻi i aso nei, o le talaʻi atu o se vaega, e aogā e faaauupegaina ai, faamaopoopo, ma faalaeiau tagata o le Atua mo le galuega talaʻi.
2 E Taʻimua Toeaina: E tāua tele le matafaioi a toeaina i le fesoasoani i tagata uma ina ia faia e lē aunoa se sao i le galuega talaʻi. E taʻimua le ovasia o le auaunaga i le faia o faatulagaga mo le auaunaga o le vaiaso. E paʻū atu i ovasia taʻitasi o suʻesuʻega tautusi le faamaopoopoina o le galuega talaʻi mo lana vaega, aemaise lava i le faaiʻuga o le vaiaso. I nisi taimi pe a feiloaʻi le faapotopotoga atoa mo le auaunaga i le fanua, e pei o feiloaʻiga e fai pe a uma le Suʻesuʻega o le Olomatamata, e tatau i ovasia o suʻesuʻega tautusi taʻitoʻatasi ona faia fuafuaga mo lana lava vaega.
3 ‘Ia Matagofie ma Sauni Lelei’: O lē ua tofia e taʻimua mo le feiloaʻiga mo le auaunaga i le fanua, e tatau ona amata i le taimi saʻo ma faapuupuu le faatasiga i le 10 po o le 15 minute. E sili pe a ia faatulaga vaega o le a ō atu e talaʻi ma faatulaga foʻi le oganuu (seʻi vaganā ua faia e ovasia o suʻesuʻega tautusi lenei fuafuaga, e pei ona taʻuina atu muamua) a o leʻi faaumaina i le tatalo. O le faia faapea, o le a faaitiitia ai le faapotopoto faatasi o le ʻautalaʻi i le oganuu, lea e aveesea ai le mamalu o la tatou galuega. E ōgatasi foʻi lea ma le fautuaga a Paulo e faapea: “Ia faia mea uma lava ma le matagofie ma le sauni lelei.” (1 Kori. 14:40) O tagata uma e auai i ia faatasitasiga e tatau ona fesoasoani i le sologa lelei o ia fuafuaga e ala i le taunuu i le taimi saʻo, ia galulue faatasi ma lē o loo taʻimua, ma ia vave ona ō ese atu i le oganuu pe a māeʻa le feiloaʻiga.
4 Ua Aufaatasia i le Autasi: O fuafuaga o le molimau atu o se vaega e tatou te mauaina ai se avanoa e sili ona lelei e iloa lelei ai isi i le faapotopotoga. E ui lava e lē teena le muaʻi faia o se fuafuaga e galulue ma se tasi, ae e mafai foʻi ona tatou maua aogā i le auai atu i le galuega i le fanua e aunoa ma le muaʻi faia o fuafuaga faapena. E ono tofia i tatou e galulue ma se tasi e tatou te lē iloaina lelei, lea e mafai ai ona tatou “tatala” atu lo tatou alofa mo i latou.—2 Kori. 6:11-13.
5 O le talaʻi o se vaega, e faalaeiauina ai i tatou ma autasia ai i tatou ma le māfana o nisi e “fai ma fesoasoani i le upu moni.” (3 Ioa. 8) O lea seʻi o tatou auai atoatoa i lea fuafuaga!