Le Māfuaaga Tatou te Manaʻomia ai le Suʻesuʻega Tautusi a le Faapotopotoga
1. Na faapefea ona amata mai le fuafuaga o Suʻesuʻega Tautusi a le Faapotopotoga?
1 O vaega mo suʻesuʻega a Tagata Aʻoga o le Tusi Paia e pei ona uluaʻi taʻua ai Molimau a Ieova, na amata i le 1895 ona taʻua o le Dawn Circles for Bible Study. Sa faaaogā tusi o le Millennial Dawn e fai ai suʻesuʻega. Mulimuli ane, na taʻua nei vaega o Berean Circles for Bible Study. (Galu. 17:11) E masani lava ona feiloaʻi se vaega toʻaitiiti i se fale o se aiga i se afiafi e talafeagai ma le vaega. O nei vaega o suʻesuʻega, o le amatamataga mai lenā o le Suʻesuʻega Tautusi a le Faapotopotoga.
2. E faapefea ona fai so tatou sao i le “fefaamāfanafanaʻi” i suʻesuʻega tautusi?
2 Faalaeiauga ma Fesoasoani: Talu ai sa tatau ona toʻaitiiti tagata i vaega mo suʻesuʻega tautusi, sa iai la se avanoa telē mo i latou o loo auai e faaalia ai lo latou faatuatua i luma o le lautele e ala i a latou tali. E iʻu ai i le “fefaamāfanafanaʻi i lo [latou] faatuatua.”—Roma 1:12.
3, 4. E faapefea ona fesoasoani iā i tatou le fuafuaga o suʻesuʻega a vaega e faataunuu ai la tatou faiva?
3 O le mātauina o le auala e aʻoaʻo atu ai le ovasia o suʻesuʻega tautusi, e fesoasoani iā i tatou e “vaevaetonuina [ai] le upu moni.” (2 Timo. 2:15, LT) Ia mātau le auala o loo ia faamamafaina ai manatu o le Tusi Paia i le mataupu. Afai e talafeagai ai ma le lomiga o loo suʻesuʻeina, e mafai ona ia faamatilatila mai manatu tāua e ala i se aotelega faaiʻu i le faaaogāina tau lava o le Tusi Paia. O lana faaaʻoaʻoga lelei e fesoasoani i le faaleleia atili ai o la tatou aʻoaʻo atu i le faiva faa-Kerisiano.—1 Kori. 11:1.
4 E ese mai i le faia o lesona faalevaiaso, e taʻimua foʻi le ovasia o suʻesuʻega a vaega i le galuega faaevagelia. I le lagolagosua atu i le ovasia o le auaunaga, e na te faia ai fuafuaga talafeagai mo le auaunaga i le fanua. E fesoasoani atu o ia i tagata uma o le vaega ina ia faataunuuina la latou matafaioi o le talaʻia o le tala lelei ma le faia o soo.—Mata. 28:19, 20; 1 Kori. 9:16.
5. O le ā le fesoasoani totino o loo mauaina i le suʻesuʻega tautusi?
5 E naunau le ovasia o le suʻesuʻega tautusi i le lelei faaleagaga o tagata taʻitoʻatasi i le vaega. E na te faailoa atu lenei naunau i sauniga a le faapotopotoga, ma pe a galulue ma isi i le auaunaga i le fanua. E na te faaaogā foʻi avanoa pe a asiasi atu i aiga o uso e tufa atu ai faalaeiauga faaleagaga iā i latou. E tatau ona lagona e tagata uma le talileleia o i latou pe a ō atu i le ovasia o le suʻesuʻega tautusi mo se fesoasoani faaleagaga po o le ā lava le taimi e manaʻomia ai.—Isa. 32:1, 2.
6. (a) Ua faapefea ona maua faamalosiauga e o tatou uso i nisi o atunuu e ala i le feiloaʻi i ni vaega laiti? (e) Ua faapefea ona e maua aogā mai le fuafuaga o suʻesuʻega tautusi?
6 Faamalosi le Tasi i le Isi: E masani lava ona feiloaʻi uso i ni vaega laiti, i atunuu o loo faasā ai le galuega a tagata o le Atua. Na taʻua e se tasi o uso e faapea: “E ui lava sa faasā la matou galuega faa-Kerisiano, ae e matou te faia lava a matou sauniga faalevaiaso, po o le ā lava le taimi e talafeagai ai, i vaega pe toʻa 10 i le toʻa 15. E matou te mauaina mai i na sauniga le malosi faaleagaga e lē gata i le suʻesuʻeina o le Tusi Paia, ae faapea foʻi ma le aufaatasiga i taimi e tuua ai le suʻesuʻega. E matou te faatusatusaina mea tutupu o loo oo iā i matou, ma na fesoasoani lea iā i matou e iloa ai, e tutusa lava tulaga faigatā o loo matou fesagaʻia.” (1 Pete. 5:9) Tau ina ia faapena foʻi ona tatou taumafai e faamalosiau le tasi i le isi e ala i le lagolagoina atoatoa o le fuafuaga o le Suʻesuʻega Tautusi a le Faapotopotoga.—Efe. 4:16.