Auala e Maua ai Aogā Mai i le Vaega mo le Talaʻiga
1. O ā aogā o le faatulagaga o le Suʻesuʻega Tautusi a le Faalapotopotoga, o loo maua pea i a tatou vaega mo le talaʻiga?
1 Pe e masani ona e misia nisi vala o le Suʻesuʻega Tautusi a le Faapotopotoga? Sa toʻaitiiti vaega ma sa sili atu ona toʻafilemu. Sa faigofie ona atiaʻe ai ni faauōga lea e fesoasoani e faatumauina ai lo tatou malosi faaleagaga. (Faata. 18:24) E iloa lelei e le ovasia o le suʻesuʻega o tatou tulaga eseese ma e na te saunia ni faalaeiauga aogā. (Faata. 27:23; 1 Pete. 5:2, 3) O loo maua pea nei aogā i a tatou vaega mo le talaʻiga.
2. E faapefea ona tatou tausolomua e atiaʻe ni faauōga i le vaega mo le talaʻiga?
2 Ia Tausolomua: O le aofaʻi o tagata i vaega mo le talaʻiga, e tutusa lelei ma le aofaʻi sa iai i vaega mo suʻesuʻega. O le galulue “soosootauʻau” ma isi, e iʻu ai i ni faauōga māfana. (Fili. 1:27) E toʻafia nisi i lau vaega ua tou galulue? Pe e mafai ona e “faalautele atu” e tusa ai o lenei vala? (2 Kori. 6:13) E lē gata i lea, o nisi taimi e tatou te valaaulia ai se tasi mai i la tatou vaega, e auai i la tatou Tapuaʻiga a le Aiga po o se taumafataga. I nisi faapotopotoga, e auauaʻi vaega i le saunia o se taumafataga mo le failauga asiasi. Pe a oo i la latou vaiaso, ona faatasitasi lea o le vaega mo se taumafataga ma faalaeiauga sili ona aogā, e tusa pe lē o auai atu ai le failauga.
3. O ā nisi o avanoa e maua ai faalaeiauga faaleagaga i le vaega mo le talaʻiga?
3 E ui e na o le faalua ona feiloaʻi le faapotopotoga atoa i le vaiaso, ae lē faapea o le a lē toe faia ai ni asiasiga faaleoleo mamoe. Ua tofia ovasia mo vaega taʻitasi, ina ia avatu faalaeiauga patino ma toleniga mo le faiva i tagata taʻitoʻatasi. Pe afai e leʻi faatulaga e le ovasia o lau vaega se aso e te lua galulue ai i le faiva, aiseā e te lē talosaga atu ai iā te ia e te lua galulue? E lē gata i lea, e talaʻi faatasi le ovasia o le auaunaga ma se isi vaega i se faaiʻuga o le vaiaso i masina taʻitasi. I faapotopotoga e toʻaitiiti vaega e iai, e ono faatulaga e le ovasia o le auaunaga e asiasi faalua i vaega taʻitasi a o faagasolo le tausaga. Po o faatulaga i lau faasologa se aso e auai ai i le faiva pe a asia lau vaega e le ovasia o le auaunaga?
4. (a) E faapefea ona faatulaga faatasiga mo le talaʻiga? (e) Aiseā e tatau ai ona iloilo pe e mafai ona faaavanoa atu o tatou fale e feiloaʻi ai mo le talaʻiga?
4 E masani lava ona maua aogā pe a feiloaʻi vaega taʻitasi i ni nofoaga eseese i faaiʻuga o vaiaso. O le eseese o nofoaga e feiloaʻi ai mo le faiva, atonu o le a faafaigofie ai mo le ʻautalaʻi ona faimalaga atu i le nofoaga o loo feiloaʻi ai po o le oganuu foʻi. O le a vave ona faatulaga le ʻautalaʻi ma agaʻi atu loa i le oganuu. E faigofie foʻi mo le ovasia o le vaega ona uaʻi totoʻa atu i ē o loo iai i lana vaega. Peitaʻi, ona o le eseese o tulaga o mea, atonu e fautuaina ai le tuufaatasi o ni vaega se lua pe sili atu foʻi. Pe afai e feiloaʻi le faapotopotoga atoa i le Aso Toonaʻi muamua o le masina, po o le māeʻa ai o le Suʻesuʻega o Le Olomatamata, e masani ona maua aogā pe a nonofo faatasi vaega taʻitasi, ma faatulaga e le ovasia lana vaega i ni nai minute, a o leʻi faaiʻuina le feiloaʻiga i se tatalo.—Tagaʻi i le pusa “Pe Mafai Ona Faaavanoa Atu Lou Maota?”
5. E ui e lē o toe faia ni Suʻesuʻega Tautusi a le Faapotopotoga, ae o le ā ua faamautinoa mai iā i tatou?
5 E ui ua lē o toe faia ni Suʻesuʻega Tautusi a le Faapotopotoga, ae o loo saunia mai pea e Ieova mea e tatou te manaʻomia e faia ai lona finagalo. (Epe. 13:20, 21) E leai se mea e tatou te matitiva ai i le tausiga a Ieova. (Sala. 23:1) E anoanoaʻi faamanuiaga e maua e ala mai i a tatou vaega mo le talaʻiga. Pe afai e tatou te tausolomua ma ʻtele a tatou fatu e lūlū,’ o le a tele foʻi mea e tatou te “selesele mai.”—2 Kori. 9:6.
[Pusa i le itulau 6]
Pe Mafai Ona Faaavanoa Atu Lou Maota?
O nisi faapotopotoga e tuufaatasi vaega mo le talaʻiga i le faaiʻuga o le vaiaso, ona e tau leai ni maota e avanoa e feiloaʻi ai. O faatasiga mo le auaunaga i le fanua o se isi vala o faatulagaga a le faapotopotoga, ma o se faaeaga le feiloaʻi atu i lou fale. Pe mafai ona faaavanoa atu lou maota? Aua e te musu e faaaogā lou maota ona e faapea e lē lelei. O le a iloiloina e toeaina po o talafeagai le tulaga o lou maota ma isi vala faapena, e pei ona sa latou faia ina ua filifilia nofoaga mo suʻesuʻega tautusi. Pe a e finagalo e ofo atu lou maota, ia faailoa atu i le ovasia o le vaega.