Faataʻitaʻi i le Faamasinotonu o Ieova
1 “E fiafia Ieova i le [“faamasinotonu,” NW].” (Sala. 37:28) O le māfuaaga lea, e ui lava ina faatulaga e Ieova le faaumatiaga o lenei lalolagi amiolētonu, ae ua ia faatulagaina se lapataʻiga e ao ona avatu muamua. (Mare. 13:10) O lenei lapataʻiga ua avatu ai i tagata le avanoa e salamō ai ma faaolaina i latou. (2 Pete. 3:9) Po o tatou taumafai malosi e faataʻitaʻi i le faamasinotonu o Ieova? Po o uunaʻia ea i tatou e tufa atu le faamoemoe o le Malo ona o puapuaga ma mafatiaga ua oo i tagata i le lalolagi? (Faata. 3:27) O le fiafia i le faamasinotonu e uunaʻia ai i tatou e faia ma le filigā se sao i le talaʻiga.
2 Aua le Faailoga Tagata a o Talaʻi Atu: Afai tatou te folafola atu fuafuaga a le Atua i tagata uma e aunoa ma le faailoga tagata o lona uiga, ua tatou “fai le [“faamasinotonu,” NW].” (Mika 6:8) E tatau ona tatou ʻalofia le faalogona o loo i tagata lē lelei atoatoa o le faia o faaiʻuga i isi e faavae i o latou foliga vaaia. (Iako. 2:1-4, 9) O Ieova o ia lea o “lē finagalo ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) E mafai e upu moni o afioga a le Atua ona faia suiga mataʻina i olaga o tagata. (Epe. 4:12) O le iloaina o lenā tulaga e uunaʻia ai i tatou e faalatalata atu i tagata ma se uiga mautinoa, e oo lava iā i latou sa mumusu e faalogo mai i aso ua teʻa.
3 Sa fefe se tasi o tuafafine e faigaluega i se faleoloa, i foliga o se tamāloa e masani ona alu ane e faatau. Ae ui i lea, ina ua tulaʻi mai se avanoa talafeagai, sa ia taumafai e taʻu atu iā te ia le Parataiso ua folafola mai e le Atua. Na ia tali saʻeā ane e faapea, o ia e lē talitonu i ni tala e fatu e ni tagata, ma o ia o se tagata hipi e ola faalagolago i fualaau faasāina. Peitaʻi e leʻi fiu ai i inā le tuafafine. I se tasi aso na fesili atu le tamāloa lea i le tuafafine po o le ā sona manatu i lona ulu uumi, ona faamatala atu lea ma le faautauta e le tuafafine le manatu o le Tusi Paia e faatatau i lea mataupu. (1 Kori. 11:14) Na faateʻia ma le maofa le tuafafine, ona o le aso na sosoo ai ua sele mamā lana ʻava, ma ua pupuu lona ulu! Na ia talosaga ane mo se suʻesuʻega faale-Tusi Paia, lea na faatulaga se uso e faia, ma oo ina faia se agaʻigaʻi i luma i le tulaga o le tuuina atu ma papatisoina. I le pei o lenei tamāloa, o le toʻatele o loo auauna iā Ieova i aso nei e matuā loto faafetai i taumafaiga maumauaʻi ma le lē faailoga tagata a ē na aumaia le feʻau o le Malo iā i latou.
4 E lē o toe umi, ona tafiesea loa lea e Ieova le amiolētonu mai le lalolagi. (2 Pete. 3:10, 13) I le taimi puupuu o loo totoe, seʻi o tatou faataʻitaʻi i le faamasinotonu o Ieova, e ala i le avatu i tagata uma o le avanoa e faasaoina ai mai le faaumatiaga o loo agaʻi mai o le lalolagi amiolētonu a Satani.—1 Ioa. 2:17.