Vaega 1—Faia o Suʻesuʻega Faale-Tusi Paia e Agaʻigaʻi i Luma
O le ā Lenei Mea o le Suʻesuʻega Faale-Tusi Paia?
1 E tusa e ono miliona suʻesuʻega faale-Tusi Paia o loo faia e tagata o le Atua i masina taʻitasi i le lalolagi aoao. I le faaaogāina o auala uigā e aʻoaʻo atu ai, o le a mafai ai ona tatou fesoasoani i nei tagata aʻoga o le Tusi Paia e agaʻigaʻi i luma seʻia oo ina tuuina atu ma papatisoina ma oo ina “taʻuagavaaina lelei e aʻoaʻo atu i isi.” (2 Timo. 2:2, NW) Pe e te manaʻo e fesoasoani i lau tagata aʻoga e faia lenā ituaiga agaʻigaʻi i luma? E amata atu i La Tatou Faiva o le Malo lenei, o le a iai se faasologa o mataupu o le a faamatalaina ai vala autū o le faia o suʻesuʻega faale-Tusi Paia e agaʻigaʻi i luma.
2 Le Taimi e Lipoti ai se Suʻesuʻega Faale-Tusi Paia: Pe afai o loo e faia e lē aunoa ma faasolosolo ni talanoaga faale-Tusi Paia e ui lava ina puupuu ae o loo faaaogā ai le Tusi Paia, faatasi ma se lomiga ua fautuaina, o loo e faia la se suʻesuʻega faale-Tusi Paia. E tusa po o fea lava e faia ai suʻesuʻega pe e ala foʻi i le telefoni. E mafai ona lipoti le suʻesuʻega pe a uma ona faataʻitaʻi le auala e fai ai le suʻesuʻega ma ua faalua ona fai ma, pe afai ua iai māfuaaga ua e talitonu ai o le a faaauau ona faia lea suʻesuʻega.
3 O loo faaaogā le polosiua o le Manaomia ma le tusi o Le Poto mo le faia o le tele o suʻesuʻega faale-Tusi Paia. Pe a uma ona suʻesuʻeina nei lomiga, ae o loo manino mai ua faia e le tagata lea se agaʻigaʻi i luma e ui lava e fai si tuai, ma ua ia talisapaia mea ua ia aʻoaʻoina, e mafai la ona faaauau le suʻesuʻega i le tusi o le Tapuaʻi i le Atua. E ono faaaogā le polosiua E Mafai Ona Avea Oe ma Uō a le Atua! e suʻesuʻe ai ma tagata e lē lelei o latou tulaga tau aʻoaʻoga po o le faitau.
4 Ua aogā tele le galuega o le faia o suʻesuʻega faale-Tusi Paia, e fesoasoani ai i le faitau miliona o tagata e avea ma soo moni o Iesu Keriso. (Mata. 28:19, 20) E ala i le faatatauina o fautuaga o le a maua i le faasologa o mataupu o le a faasolosolo mai, o le a mafai ai ona e faia se suʻesuʻega faale-Tusi Paia e agaʻigaʻi i luma.