Faatulagaga Fou mo le Autaluina o Polokalame o Fonotaga
A o faaauau ona agaʻi atu le lalolagi a Satani mai le leaga i le matuā leaga lava, ae ua faamalosia i tatou e Ieova “ia tatou teteʻa ese ma le faalēmataʻu atoa ma tuʻinanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga.” (Tito 2:12) O nisi o fuafuaga ua ia faia e ala i “le auauna faamaoni ma le mafaufau,” o polokalame o le fonotaga matagaluega ma le aso faapitoa o fonotaga. (Mata. 24:45) Maʻeu le faamalosia ai i nei aufaatasiga faaleagaga!
Ina ia fesoasoani iā i tatou ina ia faatumauina ma faatatauina aʻoaʻoga ua saunia, o le a faaaogāina ai se faatulagaga fou mo le toe autaluina o nei polokalame o fonotaga a o faagasolo le tausaga faaleauaunaga o le 2005. O le itulau e 5-6 o le faaopoopoga lenei, o loo iai mataupu e tatou te muaʻi iloa ai mea o le a talanoaina i le polokalame o nei fonotaga, faapea ai ma fesili autalu mo polokalame o fonotaga taʻitasi. O le a iloiloina e faapotopotoga nei faamatalaga i le Sauniga o le Auaunaga, a o leʻi faia ma pe a māeʻa foʻi ona auai atu i fonotaga. O le a faapefea ona faatulaga lenei mea?
I le tasi po o le toe lua vaiaso a o leʻi auai atu le faapotopotoga i le fonotaga matagaluega, o le a faia le lauga e faavae i le mataupu “Polokalame Fou o le Fonotaga Matagaluega” i le Sauniga o le Auaunaga ina ia ati aʻe ai le naunau mo le polokalame. O le a faauaʻi atu foʻi e le failauga manatu i fesili autalu ma faalaeiau tagata uma e faia ni faamaumauga i le fonotaga ina ia sauniuni ai mo le autaluga lea e faia i nai vaiaso pe a uma le fonotaga.
I nai vaiaso pe a uma le fonotaga, o le a aofia ai i le Sauniga o le Auaunaga le autaluga e 15 minute o le aso muamua o le polokalame o le fonotaga. O le vaiaso e sosoo ai, o le a autalu ai le aso lona lua o le polokalame. O fesili autalu ia ua saunia atu i le faaopoopoga lenei o le a avea ma faavae mo na talanoaga. O le a taulaʻi atu le autaluga i le aogā o mataupu na talanoaina. E ono faatulaga e toeaina ina ia faapuupuu, aveese, po o le toe faatulaga foʻi o isi vaega o le Sauniga o le Auaunaga ina ia mafai ona faia nei autaluga.
O le faatulagaga lava lea e tasi e faia e tusa ai ma le polokalame o aso faapitoa o fonotaga, seʻi vaganā ai le vaega e tasi e 15 minute le umi, e autalu ai le polokalame atoa. E tatou te mananaʻo uma lava e teu lelei lenei faaopoopoga ma faaaogā e maua ai aogā atoatoa mai aʻoaʻoga lelei ua saunia e Ieova.—Isa. 48:17, 18.