Pusa Fesili
◼ E faapefea ona tatou faataunuuina o tatou tiutefai i le faapotopotoga?
O le sologa lelei o se faapotopotoga o tagata o Ieova, o le iʻuga lea o a latou taumafaiga autasi. (1 Kori. 14:33, 40) Seʻi mafaufau i mea o loo aofia ai i le faia o se sauniga se tasi a le faapotopotoga. E ese mai i le polokalame lava ia, e tele isi gaoioiga e fai e uso ma tuafāfine i le faataunuuina o tiutefai eseese a o leʻi amata le sauniga ma le taimi foʻi e māeʻa ai. E tāua foʻi isi tiute tauave o loo faia e lē o iloa atu. E faapefea ona tatou taʻitoʻatasi ma fesoasoani atu i lenei faatulagaga?
Ia faaavanoa atu oe. O i latou e iai le agaga naunau, o le a tele mea latou te fai. (Sala. 110:3) Ia amanaʻia i latou o mamaʻi ma matutua. Ia fesoasoani i le faamamāina o le Maota o le Malo. E mafai ona tatou faia le tele o galuega e aunoa ma le tau fai mai o se tasi iā i tatou e fai. Pau lava le mea e manaʻomia, o lo tatou agaga naunau e fesoasoani.
Ia auauna ma le loto maulalo. E fiafia tagata loto maulalo e auauna atu i isi. (Luka 9:48) O le loto maulalo e taofia ai i tatou mai le faia o mea e sili atu na i lo mea e tatou te gafatia. E lē gata i lea, o le loto maulalo e taofia ai i tatou mai le faia o mea i luga aʻe o mea e mafai ona oo i ai la tatou pule.—Faata. 11:2.
Ia faamaoni. Sa timaʻia Mose e filifili ni “tagata faamaoni” e taulimaina tiute tauave i Isaraelu anamua. (Eso. 18:21) O loo manaʻomia lenā lava uiga i aso nei. Ia faautauta lelei i le taulimaina o tofiga taʻitasi ua e maua. (Luka 16:10) Afai ua lē mafai ona e faataunuuina lou tofiga, ia faamautinoa ua e faia ni faatulagaga talafeagai ina ia fai ai e se tasi pe a e lē avanoa.
Ia fai le mea e sili e te mafaia. Ua timaʻia Kerisiano e galulue ma le lotoatoa e oo lava i mea faalelalolagi. (Kolo. 3:22-24) E telē atu la se māfuaaga e faia ai faapea, pe a galulue e faaauilumaina le tapuaʻiga moni. E tusa lava pe foliga mai e faatauvaa se galuega, ae o se faamanuiaga i le faapotopotoga pe a lelei ona fai.
O tofiga taʻitasi e tatou te maua ai se avanoa e faataʻitaʻia ai lo tatou alofa mo Ieova ma o tatou uso. (Mata. 22:37-39) Tau ina ia tatou faamaoni e fai, po o ā lava tiutefai e tofia mai iā i tatou.