Pusa Fesili

◼ O le ā se auala e aupito sili ona lelei e fai ai se foaʻi e aogā i o tatou uso e utiuti le tamaoaiga i isi atunuu?

E iai taimi e tatou te faalogo ai ua manaʻomia e o tatou uso i isi atunuu se fesoasoani faaletino ona o sauāga, mala, po o isi tulaga faigatā. O isi uso ua uunaʻia i latou e auina saʻo atu se tupe i ofisa o lālā i na atunuu, e talosaga i ai e faaaogā le tupe e fesoasoani ai i se tagata, se faapotopotoga, po o se faugāfale.—2 Kori. 8:1-4.

O se uiga lelei le naunau alofa i uso talitonu, peitaʻi o loo iai isi manaʻoga faanatinati na i lo le mea o loo manatu i ai le tagata o loo faia le tauofo. I isi taimi, ua iai le tupe e tausia ai lenā manaʻoga. O le mea moni, e tatou te mautinoa a auina atu la tatou foaʻi i le ofisa o le lālā mo le galuega i le lalolagi aoao, o Tupe mo Maota o le Malo, pe mo galuega laveaʻi i taimi o mala, o le a faaaogā na foaʻi tautupe e pei ona faatonuina mai e lē ana le foaʻi.

Ua aʻoaʻoina uso i lālā uma ina ia vave gaoioi pe a tulaʻi mai se manaʻoga faanatinati. E logoina e le lālā le Vaega Pule e tusa ai ma nei manaʻoga. Afai e manaʻomia se fesoasoani faaopoopo, e ono logo e le Vaega Pule lālā e lata ane e fesoasoani pe auina tuusaʻo atu ni tupe mai le lālā ulu.—2 Kori. 8:14, 15.

O lea la, o foaʻi uma o loo mafaufau e avatu i le galuega i le lalolagi aoao, o faugāfale i isi atunuu, po o galuega laveaʻi i taimi o mala, e ao ona auina atu i le ofisa o le lālā i le atunuu o loo mau ai. Ia auina atu e ala i le faapotopotoga po o le auina saʻo atu. Ua faatulaga ai e “le auauna faamaoni ma le mafaufau,” le tausia o manaʻoga o uso i le lalolagi i se tulaga maopoopo e ala i le faatulagaga a le faalapotopotoga ua faia e le Vaega Pule.—Mata. 24:45-47; 1 Kori. 14:33, 40.