E Faapefea Ona Fai la Tatou Fesoasoani?
1 O loo masani lava ona faatulaʻi mai e Molimau a Ieova le fesili “E faapefea ona fai la tatou fesoasoani?” pe a latou faalogo i se mala faalenatura ua tupu i nisi o vaega o le lalolagi. E pei ona faaalia i tala o loo i le Galuega 11:27-30, sa saunia e Kerisiano i le uluaʻi senituri se fesoasoani mo uso sa nonofo i Iutaia ona o se oge sa iai.
2 I aso foʻi nei, ua faataga e le tulafono a la tatou faalapotopotoga, le faaaogāina o tupe mo galuega fesoasoani ma saunia ai se fesoasoani alofa mo i latou ua pagatia i mala faalenatura, po o mala ua māfua ona o tagata, ma isi taimi e tulaʻi mai ai ni manaʻoga.
3 Mo se faaaʻoaʻoga, i le tausaga na teʻa nei e toʻatele uso na faia ni foaʻi tautupe mo i latou na aafia i le sunami i Asia i Saute. Sa matuā talisapaia lenei gaoioiga alofa na auina mai e ala i meaalofa tautupe mo fesoasoani laveaʻi a le faalapotopotoga. Peitaʻi, afai o le a maʻoti mai lava faapea o meaalofa ia e mo se mala faapitoa na tupu, o nisi atunuu e manaʻomia e tusa ai ma le tulafono ona faaaogā na tupe tau lava o le fuafuaga na faailoa mai e lē na aumai ai ma ia faaaogā i totonu o se taimi faatulagaina, e tusa lava pe ua māeʻa ona tausia manaʻoga o o tatou uso i lea vaipanoa ia pe o loo totoe foʻi meaalofa na foaʻi mai.
4 O lea la, e fautuaina le fai o foaʻi mo fesoasoani laveaʻi, i le galuega i le lalolagi aoao. O loo faaaogā lenei tupe mo galuega laveaʻi faapea ma le faaauilumaina o manaʻoga faaleagaga o le ʻauuso Kerisiano. Afai ona o nisi o māfuaaga, ua manaʻo ai le tagata e faia sana foaʻi mo galuega laveaʻi e ese mai le foaʻi mo le galuega i le lalolagi aoao, e taliaina lava na foaʻi ma e faaaogā po o fea lava e tulaʻi mai ai se manaʻoga mo fesoasoani laveaʻi. Peitaʻi, o le a sili atu ona lelei le fai o foaʻi e aunoa ma ni tuutuuga po o fea e faaaogā ai ma le auala e faaaogā ai.
5 O le māfuaaga autū lava e ao ai ona auina atu foaʻi i le galuega i le lalolagi aoao, ina ia lava ai tupe e mafai ona faaaogā i vala uma o le galuega o le Malo na i lo le taofia mo na o fesoasoani laveaʻi i le lumanaʻi. E ōgatasi lenei ma le uiga o le Efeso 4:16, e tatou galulue faatasi e avatu mea o loo manaʻomia “ia iʻu ina atiina aʻe le tino e ia lava i le alofa.”