Suʻesuʻeina o le Polosiua Ia Faaauau Ona Mataala!
O le a suʻesuʻeina i le lalolagi atoa le polosiua Ia Faaauau Ona Mataala! i le vaiaso o Me 23 seʻia oo iā Iuni 20, 2005, i Suʻesuʻega Tautusi a le Faapotopotoga. Faamolemole faaaogā fesili o mulimuli mai pe a sauniuni, ma pe a taulimaina le sauniga lenei. A o faagasolo le suʻesuʻega, ia faitau le mataupu, ma faitau mau sii o loo iai pe a lava le taimi.
Vaiaso o Me 23
◼ Itulau 3-4: O lē fea o tulaga ia o loo lisi mai i inei o loo aafia faapitoa ai lava lou olaga? O le ā o loo faaalia ai iā te oe o nei tulaga e lē na o ni mea e seāseā tutupu i lou vaipanoa?
◼ Itulau 5: O le ā o loo faamautinoa ai iā te oe o loo silasila alofa moni mai lava le Atua? O le ā e ono faaalia ai le tele o lo tatou alofa i le Atua ma mea o loo ia faia?
◼ Itulau 6-8: O le ā o loo taʻu mai e le Mataio 24:1-8, 14 e faatatau i le uiga o mea o loo tutupu i le lalolagi i le taimi nei? E pei ona faaalia i le 2 Timoteo 3:1-5, o le ā le vaitaimi o loo tatou ola ai nei? O aso nei e gata ai mo le ā? O le ā ua faamautinoaina ai oe o le Tusi Paia o le Afioga moni lava a le Atua? O le ā le Malo lea e tatou te talaʻia?
◼ Itulau 9-10: Aiseā e tatou te iloiloina ai ma le faaeteete a tatou filifiliga i aso faisoo ma mea e ao ona faamuamua i o tatou olaga? (Roma 2:6; Kala. 6:7) A o e toe autaluina fesili i le itulau e 10, o ā mau e oo mai i lou mafaufau lea e ao ona taaʻina ai mea e te faia?
Vaiaso o Me 30
◼ Itulau 11: Aiseā e ao ai ona iloiloina e le tagata lava ia fesili o loo i lenei itulau? (1 Kori. 10:12; Efe. 6:10-18) O le ā o loo faaalia e a tatou tali i nei fesili i le auala o loo tatou faatāuaina ai fetalaiga a Iesu i le Mataio 24:44?
◼ Itulau 12-14: O le ā ‘le itu aso o le faamasinoga’ o loo taʻua i le Faaaliga 14:6, 7? O le ā le uiga o le “matataʻu i le Atua, ma avatu iā te ia le viiga”? O ai Papelonia le Aai Tele, ma o le ā o le a tupu iā te ia? O le ā le gaoioiga e tatau ona tatou fai i le taimi nei agaʻi iā Papelonia le Aai Tele? O le ā le isi mea o aofia ai i le itu aso o le faamasinoga lea na valoia mai? O le ā le aafiaga o lo tatou lē iloa o “le aso po o le itu aso” o le sala faafaamasinoga na valoia mai e le Atua? (Mata. 25:13)
◼ Itulau 15: O le ā le finauga i le pule silisili ese, ma e faapefea ona aafia ai i tatou taʻitoʻatasi?
◼ Itulau 16-19: O le ā le “lagi fou” ma le “lalolagi fou”? (2 Pete. 3:13) O ai na ia folafola mai nei mea? O ā suiga o le a aumaia e le lagi fou ma le lalolagi fou? Po o le a aogā ea iā i tatou na suiga?
Vaiaso o Iuni 6
◼ Itulau 20-21: O le ā le lapataʻiga e faatatau i le sosola na avatu e Iesu i ona soo i le uluaʻi senituri? (Luka 21:20, 21) O anafea na mafai ona fai ai lenā solaaga? Aiseā na faanatinati ai ona sosola ese e aunoa ma se faatuai? (Mata. 24:16-18, 21) Aiseā na toʻatele ai tagata na lē amanaʻiaina lapataʻiga? Na faapefea ona aogā i le faitau afe o tagata i Saina ma Filipaina le utagiaina o lapataʻiga maufaatuatuaina? Aiseā ua sili atu ai ona faanatinati le utagiaina o le lapataʻiga a le Tusi Paia e faatatau i le iʻuga o lenei faiga o mea? I le vaai atu i le matuā faanatinati tele o le taimi, o le ā lo tatou tiute tauave e ao ona fai? (Faata. 24:11, 12)
◼ Itulau 22-23: I Ausetalia i le 1974 ma Kolomepia i le 1985, aiseā na faataligatuli ai le toʻatele i lapataʻiga na avatu e faatatau i mala, ma o ā iʻuga na oo i ai? O le ā sou manatu i le auala semanū e te gaoioi ai i nei lapataʻiga, ma aiseā? O le ā e faaalia ai pe tatou te ono utagiaina le lapataʻiga na avatu i aso o Noa? Aiseā na mananaʻo ai tagata e ola i Sotoma anamua ma laueleele na latalata ane i lenā nuu? E faapefea ona tatou maua aogā e ala i le mafaufau mamafa i le mea na tupu iā Sotoma?
Vaiaso o Iuni 13
◼ Itulau 24-27: Faaaogā “Fesili o le Suʻesuʻega” i le itulau e 27.
Vaiaso o Iuni 20
◼ Itulau 28-31: Faaaogā “Fesili o le Suʻesuʻega” i le itulau e 31.
O lo tatou iloiloina o le polosiua, o le a fesoasoani iā i tatou ia faaauau ona “mataala” ma faamaonia o loo tatou nofo sauni. Tau ina ia avea la tatou faiva i le lautele ma mea e atagia atu ai pea le faanatinati tele o le folafolaga faaagelu: “Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga.”—Mata. 24:42, 44; Faaa. 14:7.