Faasologa a le Aiga—Auaunaga i le Fanua a le Aiga
1 E fiafia Ieova e silasila mai i ē laiti o loo vivii atu i lona suafa. (Sala. 148:12, 13) I aso o Iesu, sa mafai lava ona “saunia le viiga mai gutu o tama meamea ma tama fesusui” i le Atua. (Mata. 21:15, 16) O loo faapena foʻi i aso nei. Mātua e, e faapefea ona e fesoasoani i lau fanau ia tutupu aʻe o nisi e naunau e viia ma le maelega Ieova e ala i le faiva faa-Kerisiano? E pei lava ona faamamafa atu i le mataupu i luga i sauniga a le faapotopotoga, o le mea e sili ona tāua o lau faataʻitaʻiga. Na taʻua e se tasi o tamā lagona o loo iai i le tele o mātua e faapea: “E lē faia e le fanau mea o loo e fai atu e fai; ae latou te fai mea o loo e faia!”
2 Na taʻua e se tuafafine sa tausia aʻe e mātua e matataʻu i le Atua e faapea: “E matou te lē feala aʻe i taeao o Aso Toonai ma tau fesili pe matou te ō i le talaʻiga. E matou te iloa e matou te ō.” I se tulaga talitutusa, ia totō i loto o lau fanau le tāua o le galuega talaʻi, e ala i le faia o se faasologa faifai pea faalevaiaso mo le auai i le auaunaga i le fanua o se aiga. E lē gata e aʻoaʻoina ai e lau fanau mea mai le vaavaai iā te oe, ae e te mātauina ai foʻi o latou uiga, amio, ma tomai a o tuputupu aʻe.
3 Toleniga Faifaipea: Ina ia olioli le fanau i le faiva, e manaʻomia ona sauniunia i latou ina ia lelei ona fai so latou sao i le faiva. Na faapea mai foʻi le tuafafine e pei ona taʻua muamua: “E matou te lē na ona auai e aunoa ma se sao e fai pe a matou ō faatasi ma o matou mātua i le la galuega. E matou te iloa e tatau ona fai so matou sao, e tusa lava pe na o le oomi o le logo o le faitotoʻa po o le tuu atu foʻi o se tamaʻi pepa. O le sauniuni lelei a o leʻi oo i le talaʻiga i le faaiʻuga o le vaiaso, e matou te iloa lelei ai lava mea o le a matou talanoa atu ai.” E mafai ona e saunia le ituaiga toleniga lenā mo lau fanau e ala i le faaalu o ni nai minute i vaiaso taʻitasi e sauniunia ai i latou mo le faiva, a lē o le taimi o le suʻesuʻega faaleaiga ia o se isi taimi.
4 O le talaʻi faatasi o se aiga, e maua ai isi avanoa e totō ai le upu moni i loto o lau fanau. Na alu se tamā Kerisiano ma ave lona afafine i se savaliga e ono maila (10 kilomita) e alu ai, faapea ma le toe foʻi mai i le tufatufaina atu o savali i tagata e nonofo i le vanu lea e sosoo atu. Na toe taʻua ma le fiafia e le teine lea e faapea, “o savaliga na, na totō ai e loʻu tamā upu moni i loʻu loto.” (Teu. 6:7) Tau ina ia faapena foʻi ona faamanuiaina oe i le avea o le auaunaga i le fanua o se vaega o le faasologa a lo outou aiga i vaiaso taʻitasi.