Ia Aʻoaʻo Lau Fanau e Vivii iā Ieova
1. Pe mafai e tamaiti ona vivii iā Ieova?
1 Ua faalaeiauina e le Salamo 148:12, 13, tama ma teine e “vivii atu i le suafa o Ieova.” Ua i le Tusi Paia le tele o faaaʻoaʻoga o tamaiti na faia faapea. O se faaaʻoaʻoga, na ‘auauna Samuelu o se tamaitiiti i luma o Ieova.’ (1 Samu. 2:18) Na taʻu atu e se “teine itiiti” i le avā a Naamanu, e iai le perofeta a Ieova i Isaraelu e mafai ona faamālōlōina le lepela o Naamanu. (2 Tu. 5:1-3) Ina ua ulufale Iesu i le malumalu ma faia ai galuega mamana, na alalaga atu “tama” e faapea: “Osana i le alo o Tavita.” (Mata. 21:15) E faapefea ona aʻoaʻo e mātua a latou fanau e vivii iā Ieova?
2. Aiseā e tāua ai ona faataatia e mātua se faaaʻoaʻoga lelei mo a latou fanau?
2 Faaaʻoaʻoga: A o leʻi totō i loto o le fanau le upu moni, na faatonuina tamā Isaraelu ia muamua ona alolofa iā Ieova ma ia i ai i o latou loto ana faatonuga. (Teu. 6:5-9) Afai e te talanoa fiafia e uiga i le faiva ma avea o se vaega o la outou faasologa o mea e fai i vaiaso taʻitasi, o le a manatu la lau fanau i le faiva o se mea e tāua ma faamalieina ai.
3. Na faapefea ona aogā i se tuafafine faaaʻoaʻoga a ona mātua?
3 E fiafia se tuafafine e manatua: “A o oʻu tuputupu aʻe, sa aofia i le faasologa a lo matou aiga le auai i le faiva i le fanua i faaiʻuga o vaiaso taʻitasi. Na ou iloa le olioli o oʻu mātua e talaʻi. Na matou ola aʻe foʻi ma manatu i le faiva o se mea e fiafia ai.” Na avea lenei tuafafine o se tagata talaʻi lē papatiso i le fitu o ona tausaga, ma ua 33 nei tausaga i le auaunaga faataimi atoa.
4. O le ā le uiga o le toleni faasolosolo o le fanau?
4 Toleniga Faasolosolo: Ia faaaofia lau fanau a o tou auai i le faiva. E latou te ono faatatagi le logo o le faitotoʻa, tuu atu i lē ona le fale se sāvali, pe faitau foʻi se mau. E atili ai ona latou olioli, ma fesoasoani ia iai le mautinoa i lo latou tomai e taʻu atu ai le feʻau o le Malo. A o tutupu aʻe e avea ma tagata matutua, o le a faateleina foʻi lo latou sao i le faiva. O lea, ia fesoasoani iā i latou e agaʻigaʻi i luma ma manatunatu i ni sini faaleagaga.
5. O ā ni mea e manaʻomia ina ia agavaa ai se tamaitiiti e avea o se tagata talaʻi e leʻi papatisoina?
5 Ia talanoa i toeaina pe a e manatu ua agavaa lau fanau e avea ma tagata talaʻi lē papatiso, ma pe a latou faaleo mai se faanaunauga e faia faapea. O le avea ma se tagata talaʻi, e tāmau ai i o latou mafaufau lo latou tiute tauave o le vivii iā Ieova. Ia manatua, e lē manaʻomia ona iloa e le tamaitititi le tele o mea e iloa e le tagata matua ua papatiso ina ia agavaa ai. Po ua malamalama lou alo i aʻoaʻoga faavae o le Tusi Paia? Po o ia piiama i tapulaa tauamio a le Tusi Paia? Po o ia naunau e fai se sao i le talaʻiga ma iloa o ia o se Molimau a Ieova? Afai o lea, e ono filifili la toeaina e faapea ua agavaa o ia e avea ma tagata talaʻi e leʻi papatisoina.—Tagaʻi i le tusi Ua Faamaopoopo Ina ia Faia le Finagalo o Ieova, itu. 79-82.
6. Aiseā e tāua ai ona aʻoaʻo e mātua a latou fanau?
6 E manaʻomia ni taumafaiga i le aʻoaʻoina o le fanau e vivii iā Ieova mai i o latou loto. Peitaʻi, e leai se mea e sili atu ona olioli ai mātua na i lo le vaai atu o agaʻigaʻi i luma faaleagaga a latou fanau. E sili atu ona tāua le fiafia o le finagalo o Ieova pe a taʻutaʻu atu e tamaiti ana galuega ofoofogia.